Friday 25 January 2013

အစရှိ အနောင်နောင်မို့ အကျင့်ပါသွားမှာကို စိုးမိတယ်

နံနက်ခင်း တက်သစ်စ နေရောင်ခြည် နွေးနွေးက လမ်းကလေးပေါ်တွင် ဟိုတစ်ကွက် ဒီတစ်ကွက် စွန်းပေနေသည်။ ရော်ရွက်ကြွေတို့ ကလဲ လမ်းကလေးပေါ်တွင် ဟိုတစ ဒီတစ ပြန့် ကြဲနေကြ၏။ လေအဝှေ့ တွင် ရော်ရွက်ကြွေတို့  ပွတ်တိုက် ပြေးလွှားသွားသံမှတပါး လမ်းကလေးက ပကတိ တိတ်ဆိတ် ငြိမ်သက်နေသည်။ နံနက်ခင်း အစောပိုင်း အချိန်မို့ လမ်းကလေးပေါ်တွင် လူသွားလူလာတို့  မရှိသလောက် ကျဲပါးနေ၏။ ထိုလမ်းလေးအတိုင်း အရိပ်တစ်ရိပ်က မျောလွင့်လာနေသည်။ တဖြည်းဖြည်းဖြင့် ထိုအရိပ်က လူတစ်ယောက်၏ အသွင်သဏ္ဍန် ပီပြင်လာသည်။ တိတိကျကျ ပြောရလျှင် အထက်ပိုင်းက အဖြူ၊ အောက်ပိုင်းက အစိမ်းနှင့် ကျောပိုးအိတ်တစ်လုံးကို လွယ်ပိုးထားသည့် ကောင်လေးတစ်ယောက် လှမ်းလျှောက် လာနေခြင်း ဖြစ်သည်။ နံနက်ခင်း စောသေးသည် ဆိုသော်ငြားလဲ ယခုကဲ့သို့ အဝတ်အစားကို ဝတ်ဆင်ထားသူတို့ လမ်းပေါ်တွင် ရှိနေသင့်သည် အထိတော့ အချိန်က မစောတော့။ ခြေဦးတည့်ရာ လျှောက်လာဟန် တူသည့် ကောင်လေးက စိတ်နှင့်ကိုယ်လဲ ကပ်ဟန်မတူ။ သေချာ ဂရုစိုက်ကြည့်မိလျှင် ကောင်လေး၏ မျက်လုံးတို့ က ကျီးကြည့်ကြောင်ကြည့်ဖြင့် ဂဏာမငြိမ် ဖြစ်နေကြောင်းကို အလွယ်တကူ သိနိုင်ရှိသည်။ စိုးရွံစိတ်၊ တစ်စုံတစ်ခုကို ဝေခွဲမရ ဖြစ်နေဟန်တို့ က ကောင်လေး၏ မျက်ဝန်းထဲတွင် တဖျတ်ဖျတ် ပြေးနေ၏။ သူ့ အတွက် ယခု အကြိမ်က ပထမဆုံအကြိမ် ဖြစ်ဟန်တူသည်။ တစ်နေရာ အရောက်တွင် ကောင်လေး၏ ခြေလှမ်းတို့ ရပ်တန့် သွား၏။ အရောင်အမျိုးမျိုးပြောင်းကာ  ယောက်ယက်ခတ်နေသည့် မျက်ဝန်းတို့ လဲ အနည်ထိုင် သွားသည်။ ခြေဦးတည့်ရာ လျှောက်သွားနေရသည့် သူ့ အတွက် နားခိုစရာ နေရာတစ်ခုကို ရှာတွေ့ ခဲ့လေပြီ။

ပြည်ပန်းခြံဟု ရေးထားသည့် ဆိုင်းဘုတ်အောက်မှ အတွင်းဘက်သို့  လျှောက်ဝင်လာခဲ့လိုက်သည်။ ပန်းခြံ၏ အတွင်းဘက်တွင် ဆိတ်ငြိမ်အေးချမ်းနေသည်။ ကျေးငှက်တို့ ၏ စိုးစီစိုးစီ အော်မြည်သံမှအပ ပန်ခြံအတွင်းဘက်တွင် အရာရာက တိတ်ဆိတ်ငြိမ်သက်နေ၏။ ဓာတ်ပုံဆိုင်ကို ခင်းကျင်းနေသည့် လူက ပန်းခြံထဲကို လျှောက်ဝင်လာသည့် ကောင်လေးကို တစ်ချက်မော့ကြည့်သည်။ ထို့ နောက် သူ့ အလုပ်ကိုသူ ဆက်လုပ်နေ၏။ သူ့ အတွက် ဒီမြင်ကွင်းမျိုးက ဘာမှ မထူးခြား သာမန် မြင်တွေ့ နေကျ မြင်ကွင်းမျိုး ဖြစ်သည်။ ကောင်လေးက ပန်းခြံ၏ အတွင်းဘက်သို့ ဆက်လျှောက် ဝင်လာခဲ့လိုက်သည်။ မွှေးပျံသင်းထုံနေသည့် ပန်းရနံကို ရှူရှိုက်ရင်း သူ့ စိတ်တို့ ကြည်လင် လန်းဆန်းလာသည်။ ထို့ နောက် ရှေ့ဘက်သို့ ဆက်လျှောက်လာရင်း မြစ်ကမ်းဘက်ကို မျက်နှာမူထားသည့် ခုံတန်းလေးတွင် ဝင်ထိုင်လိုက်သည်။ ရှင်းသန့် လတ်ဆတ်နေသည့် မြစ်လေကို တစ်ချက် ရှူသွင်းလိုက်ရင်း ပတ်ဝန်းကျင်ကို မျက်စိ ကစားကြည့်လိုက်၏။ ခပ်လှမ်းလှမ်းတွင် တံမြက်စည်း လှည်းနေသည့် လူကြီးတစ်ယောက် မှအပ ဘယ်သူမှ ရှိမနေ။ သူကျေနပ်သွားသည်။ ဖြစ်နိုင်လျှင် ခုချိန်တွင် လူအများကြီး သူ့ ကို မတွေ့ စေလို။ သူ့ အကြည့်တို့ ကို အရှေ့ဘက်သို့ ရွှေ့ လိုက်သည်။ မြစ်ထဲတွင် ဥဒဟို သွားလာနေသည့် သင်္ဘော၊ လှေ၊ သမ္ဗန်များနှင့် မြစ်ဟိုတစ်ဖက်ကမ်းမှ ရှုခင်းများကို ငေးမောကြည့်နေရင်း သူ၏စိတ်တို့ လွတ်လပ် ပေါ့ပါးလာ၏။ ပတ်ဝန်းကျင် သဘာဝရှုခင်းများ ထဲတွင် သူ့ အာရုံတစ်ခုလုံး နစ်မျောပျော်ဝင်သွားတော့သည်။

"ကောင်လေး... ကျောင်းမသွားဘူးလား"

စောစောက တံမြက်စည်း လှည်းနေသည့် လူကြီးက အနားသို့ ရောက်လာပြီး မေးလိုက်ခြင်းဖြစ်သည်။ ကြည်လင်ရွှင်ပျနေသည့် ကောင်လေး မျက်နှာက ချက်ချင်း သုန်မှုန်သွား၏။ ထို့ နောက် တမြက်စည်းလှည်းသည့် လူကြီးကို ဘုကြည့်ကြည့်လိုက်သည်။ အသိသာကြီးကို လာမေးနေသဖြင့် စိတ်ထဲလဲ ခုသွားမိ၏။ ကောင်လေး စိတ်ခုသွားမှန်း သိသော်လဲ လူကြီးက မသိချင်ယောင်ဆောင်ကာ ဆက်မေးသည်။

"ဘာလဲ ဆရာမက စာမေးလို့ မရရင် အရိုက်ခံရမှာ ကြောက်လို့ ကျောင်းပြေးလာတာ မဟုတ်လား"

ကောင်လေး ခန္ဓာကိုယ် ဆတ်ကနဲ တစ်ချက် တုန်သွားသည်။ ထို့ နောက် လူကြီးကို အလန့် တကြားဘဲ မော့ကြည့်မိ၏။ ဒီလူကြီး ဘယ်လိုကြောင့် သိပါလိမ့်ဟုလဲ တွေးလိုက်မိသည်။ ကျောင်းကဘဲ နောက်ကနေ လိုက်ခေါ် ခိုင်းလိုက်သလားဟု ပတ်ဝန်းကျင်ကိုလဲ မျက်စိကစား ကြည့်လိုက်မိသည်။ သို့ သော် မသင်္ကာစရာ ဘာတစ်ခုမှ မတွေ့ ရ။

"မင်းတစ်ယောက်တည်းလား... တခြား အဖော်တွေ ပါသေးလား"

လူကြီးက ဆက်မေးလာသည်။ ကောင်လေးက ဘာမှ ပြန်မဖြေ သည့်အပြင် မျက်နှာကိုလဲ မြစ်ကမ်းဘက်သို့  လှည့်ထားလိုက်၏။ လူကြီးကို အရေးမလုပ် ဂရုမစိုက်သည့် သဘောဖြစ်သည်။ လူကြီးက ဆေးပေါ့လိပ်တိုကို မီးညှိဖွာရှိုက်လိုက်ပြီး ခုံတန်းလေး တစ်ဖက်တွင် ဝင်ထိုင်လိုက်၏။ ကောင်လေးက လူကြီးကို မနှစ်မြို့ ဟန်ဖြင့် တစ်ချက်စောင်းငဲ့ ကြည့်လိုက်သေးသည်။ သို့ သော် ဘာမှတော့မပြော။ 

"ဆေးလိပ်သောက်တတ်လား"

ကောင်လေး၏ မျက်နှာက ပိုလို့ မှုန်မှိုင်း သွားသည်။

"ကျွန်တော် ဆေးလိပ် မသောက်တတ်ဘူး"

ကောင်လေး၏ အသံက  အနည်းငယ် ကျွတ်ဆတ် မာကျောနေသည်။

"ကောင်းတယ် အစရှိ အနောင်နောင်တဲ့... ဘယ်တော့မှ အစသွားမလုပ်နဲ့ "

လူကြီးက အကြည့်ကို မြစ်ရှုခင်းဘက်သို့ ပို့ ထားရင်း ဆေးလိပ်တိုကို မက်မက်မောမော ဖွာရှိုက်လိုက်သည်။

"သူတို့ တွေကတော့ ပြောကြလိမ့်မယ် စမ်းကြည့်ပါလား တစ်ဖွာ နှစ်ဖွာနဲ့ ဘာမှ မဖြစ်ပါဘူးလို့ ... ဒါပေမယ့် သွားအစမလုပ်မိစေနဲ့ ... တကယ်က အဲဒီ တစ်ဖွာ နှစ်ဖွာကဘဲ စခဲ့ကြတာ"

လူကြီးက ကောင်လေး၏ စကားအပြန်ကို မစောင့် သူပြောလိုရာကိုသာ ဆက်ပြောသည်။

"ကွမ်းလဲ စားတတ်မဲ့ပုံ မပေါ်ဘူး"

ကောင်လေးက လူကြီးကို တချက် စောင်းငဲ့ ကြည့်လိုက်သည်။ သို့ သော် ဘာမှတော့ ပြန်မပြော။

"သူတို့ ကတော့ ဆေးနဲ့ မစားနိုင်ရင် ဆေးဖယ်ပြီး စားကြည့်ဖို့ ဒါမှမဟုတ် အချို(သို့ )အစိမ့် တမျိုးမျိုးကို စမ်းကြည့်ဖို့ ပြောလိမ့်မယ်။ သွားတော့ အစမလုပ်နဲ့ အကျင့်ပါသွားမယ်။ တကယ်က အဲဒီက စခဲ့ကြတာ..."

လူကြီးက မြစ်ရှုခင်းကို ငေးရီ ကြည့်နေရင်း နှုတ်မှ တတွတ်တွတ်ဖြင့် ဆက်ပြောနေပြန်၏။

"အရက်သောက်တာကိုလဲ သွားအစ မလုပ်မိစေနဲ့ ... သူတို့ ကတော့ စမ်းကြည့်ဖို့ ကို တိုက်တွန်းကြလိမ့်မယ်။ တစ်ခွက်လောက်နဲ့ တော့ ဘာမှ မဖြစ်ပါဘူး။ အနံထွက်ရင်လဲ ပီကေ ဝါးလိုက်ရင် ဒါမှမဟုတ် မာလကာရွက် ဝါးလိုက်ရင် ပျောက်ပါတယ်လို့ ပြောကြလိမ့်မယ်။ ဒါပေမယ့် သွားတော့ အစမလုပ်နဲ့ ... တကယ်ဆို အဲဒီ တစ်ခွက် နှစ်ခွက်ကဘဲ စခဲ့ကြတာ..."

ကောင်လေးက လူကြီးဘက်ကို လှည့်လာပြီး လူကြီး ပြောသမျှကို ခေါင်းလေး တငြိမ့်ငြိမ့်ဖြင့် သေချာ နားထောင်လာသည်။ သို့ သော် ဘာမှတော့ ဝင်မပြောသေး။

"မကောင်းတဲ့အရာဆို ဘာကိုမှ သွားအစမလုပ်မိစေနဲ့ အစရှိ အနောင်နောင်ကွဲ့ ။ မူးယစ်ဆေးဝါးတို့ ၊ လောင်းကစားလုပ်တာတို့ ကိုလဲ အစသွား မလုပ်နဲ့ ။ ဒီလိုဘဲ ကျောင်းပြေးတာကိုလဲ အစသွားမလုပ်နဲ့ အကျင့်ပါသွားမယ်"

လူကြီး၏ စကားသံအဆုံးတွင် ကောင်လေးထံမှ စကားသံ ထွက်လာသည်။

"သူတို့ ဆိုတာက ဘယ်သူ့ ကို ပြောတာလဲ ဦးလေး"

မြစ်ဘက်ကို မျက်နှာမူပြီး ဆေးလိပ်ကို ဖွာလိုက် စကားတို့ ကို တတွတ်တွတ်ဖြင့် ပြောလိုက် လုပ်နေသည့် လူကြီးက ကောင်လေးဘက်သို့ လှည့်လာသည်။ ထို့ နောက်

"သူတို့ ဆိုတာ... သူတို့ ဆိုတာက အင်း... လူလေးကို ပုံပြင်တစ်ပုဒ် ပြောပြမယ် နားထောင်မလား"
"ဟုတ်ကဲ့ ကျွန်တော် နားထောင်ချင်ပါတယ်ဦးလေး"

ပုံမပြောခင် လူကြီးက မြစ်ရှုခင်းတို့ ကို ငေးရီကြည့်ရင်း ဆေးလိပ်တိုကို ခပ်ပြင်းပြင်း တစ်ချက် ဖွာရှိုက်လိုက်ပြန်သည်။

"ဟိုး... တချိန်ကပေါ့။ လူလေးလိုဘဲ စာမရလို့ ကျောင်းပြေးလာတဲ့ ကောင်လေးတစ်ယောက် ခြေဦးတည့်ရာ လျှောက်လာရင်း ဒီပန်းခြံ၊ ဒီခုံနေရာလေးကို ရောက်လာခဲ့ဖူးတယ်။ လူလေးလိုဘဲ သူ့ အတွက် ပထမဦးဆုံး ကျောင်းပြေးဖူးတဲ့ အတွေ့ အကြုံပေါ့"
"ကျွန်တော့် ကျောင်းပြေးတာ ပထမဆုံး အတွေ့ အကြုံလို့ ဦးလေးက ဘယ်လို သိတာလဲ"

ကောင်လေးက အံသြဟန်ဖြင့် လူကြီးကို မေးလိုက်သည်။

"ကြည့်တတ်ရင် သိတာပေါ့ လူလေးရဲ့ ။ ဒါပေမယ့် အဲဒီကောင်လေးကတော့ လူလေးလို ကံမကောင်းဘူးကွဲ့ "
"ဘာဖြစ်လို့ လဲ ဦးလေး..."
"ဘာဖြစ်လို့ လဲ ဆိုတော့ အဲဒီနေ့ က သူ့ လိုဘဲ ကျောင်းပြေးလာတဲ့ နှစ်ကြီး ကျောင်းသားတစ်စုနဲ့ သွားတွေ့ တယ်"
"ဟာ... ကောင်းတာပေါ့ ဦးလေးရ...။ အဖော်တောင် ရသေးတယ်။ ကျွန်တော်ဆို ခုအဖော်မရှိလို့ ပျင်းနေတာ"
"ဟုတ်တယ် အဲဒီအချိန်က သူလဲ အဲဒီလိုဘဲ တွေးပြီး ပျော်သွားတာပေါ့"
"ဒါဆို သူတို့ ခင်သွားကြပြီး ဒီပန်းခြံထဲမှာ ကစားကြမှာပေါ့နော် ပျော်စရာကြီး"
"ဒါပေါ့ သူတို့ တွေ ဒီပန်းခြံထဲမှ အတူတူ ကစား ကြတာပေါ့။ ကောင်လေးလဲ အပျော်ကြီးကို ပျော်ခဲ့မိတာပေါ့။ သူရဲ့ ပထမဆုံး အတွေ့ အကြုံဘဲလေ ပျော်တာပေါ့"
"သူတို့ တွေ မြို့ ထဲကို လျှောက်မလည်ကြဘူးလား ဦးလေး။ အဖွဲ့ လိုက်လျှောက်လည်ရင် တော်တော် ပျော်ဖို့ ကောင်းမယ်နော်"
"ဘယ်နေမလဲ သူတို့ လျှောက်လည်ကြတာပေါ့ လူလေးရဲ့ ။ သူတို့ တွေ ပန်းခြံထဲမှာ ကစားကြပြီး မောတော့ ခဏနားကြတယ်။ အဲဒီမှာ ကျောင်းသားကြီးတွေက ကွမ်းထုတ်စားတဲ့ လူကစား၊ ဆေးလိပ်သောက်တဲ့ လူကသောက်ပေါ့။ ကောင်လေးကတော့ ကွမ်းမစား၊ ဆေးလိပ်မသောက်တတ် ဆိုတော့ ဒီတိုင်း ရေသောက် အမောဖြေပေါ့။ အဲဒီနောက် သူတို့ တွေ မြို့ ပြင်က ထန်းတောထဲ သွားပြီး ထန်းရေ သွားသောက်ကြတယ်"
"ကောင်လေးက ထန်းရေ သောက်တတ်လို့ လား ဦးလေး"
"ဘယ်သောက်တတ်မလဲကွဲ့ ... ဒါပေမယ့် အဖော်ကောင်းတော့ ထန်းတောထဲ ပါသွားတာပေါ့။ ဒါပေမယ့် ထန်းတော ရောက်တော့ တခြား ကျောင်းသားတွေက အဆွယ် ကောင်းတော့ တစ်ခွက်၊ နှစ်ခွက်လောက် သောက်ဖြစ်တာပေါ့"

လူကြီး ပြောသမျှကို ကောင်လေးက ခေါင်လေး တညိမ့်ညိမ့်ဖြင့် စိတ်ပါဝင်စားစွာ နားထောင်နေသည်။ ကောင်လေး စိတ်ဝင်စားစွာ နားထောင်နေသည်ကို တွေ့ သဖြင့် လူကြီးက သူ့ စကားကို ထပ်ဆက်သည်။

"ထန်းရေသောက်ပြီးတော့ သူတို့ တွေ မြို့ ထဲကို သွားပြီး ရုပ်ရှင်ကြည့်ကြတယ်။ အဲဒီနောက် ပန်းခြံထဲ ပြန်သွားပြီး အတွဲချောင်းကြသေးတယ်။ ညနေရောက်တော့မှ သူတို့ တွေ လူစုခွဲပြီး အိမ်ပြန်ကြတယ်"
"တော်တော် ပျော်ဖို့ ကောင်းမှာဘဲနော်"
"ဒါပေါ့ တော်တော်ကို ပျော်ဖို့ ကောင်းခဲ့တာပေါ့။ အဲဒီနေ့ က ကောင်လေးလဲ ကျောင်းပြေးတဲ့ အရသာကို သိသွားတယ်လေ"

လူကြီးက မြစ်ပြင်ကို ခပ်ငေးငေးလေး ကြည့်နေရင်း သက်ပြင်းကို ခပ်မျှင်းမျှင်းလေး မှုတ်ထုတ်လိုက်သည်။

"အဲဒီနောက်ပိုင်းလဲ သူတို့ တွေ ဆက်ပြီး တွေ့ ဖြစ်ကြသေးလား ဦးလေး"

လူကြီးက ကောင်လေးကို တစ်ချက်စူးစိုက် ကြည့်လိုက်ပြီး...။

"လူလေးက ဘာကြောင့် ဒီလို မေးရတာလဲ"
"သြော်... ခုလို တပျော်တပါးကြီး လွတ်လွတ်လပ်လပ် လျှောက်လည်ရတာ တော်တော် ပျော်ဖို့ ကောင်းမှာဆိုတော့ သူတို့ ထပ်တွေ့ ဖြစ်ကြသေးလား သိချင်လို့ ပါ ဦးလေး"

ကောင်လေးက ခေါင်းလေးငုံသွားပြီး ခပ်တိုးတိုးလေး ပြောသည်။

"ဟုတ်တယ် လူလေး ပြောတာမှန်တယ်။ ကောင်လေးကလဲ အဲဒီလို ခံစားမှုနဲ့ ဘဲ ခဏခဏ ကျောင်းပြေးဖြစ်လာတယ်။ နောက်ပိုင်းမှာ ကောင်လေးဟာ အပေါင်းအသင်း စုံလာပြီး ကွမ်းစားတတ်လာတယ်။ ဆေးလိပ်လဲ သောက်တတ်လာတယ်။ ထန်းရည်၊ အရက်ကိုလဲ သောက်တတ်လာခဲ့တယ်။ ကျောင်းလဲ ခဏခဏ ပြေးလွန်းလို့ အိမ်ကို တိုင်စာပို့ ပြီး အုပ်ထိန်းသူ မိဘတွေကို ခေါ်ရတဲ့အထိ အခြေအနေက ဆိုးလာခဲ့တယ်။ ဒါပေမယ့် မကောင်းမှုမှာ ခုံမင်နေပြီ ဖြစ်တဲ့ ကောင်လေးဟာ ဘယ်လိုမှ ဆိုဆုံးမလို့ မရတော့ဘူး။ အဆိုးဆုံးကတော့ ကျောင်းကနေ အထုတ်ခံလိုက်ရတဲ့ ကောင်လေးဟာ စိတ်ကြွဆေး၊ ဆေးခြောက် အဲဒီကနေနောက်ပိုင်းမှာ ဘိန်းဖြူလို မူးယစ်ဆေးတွေကို သုံးစွဲလာတဲ့အထိ အခြေအနေ ဆိုးလာခဲ့တယ်။ သူ့ အိမ်ကလဲ သူ့ ကို ထိန်းလို့ မနိုင်တော့ဘူးလေ"

လူကြီးက စကားအရှည်ကြီးကို ပြောပြီးနောက် မောသွားသဖြင့် မီးသေသွားသည့် ဆေးပေါ့လိပ်ကို မီးညှိ၍ ထပ်မံ ဖွာရှိုက်လိုက်ပြန်သည်။

"အဲဒီကောင်လေးက နောက်ဆုံးမှာ ဘယ်လို ဖြစ်သွားလဲဦးလေး"

ကောင်လေး၏ မေးသံ အဆုံးတွင် လူကြီး တစ်ချက်တွေကနဲ ဖြစ်သွားသည်။ ထို့ နောက် ဆေးလိပ်တိုကို ခပ်ပြင်းပြင်းလေး တစ်ချက် ဖွာရှိုက်လိုက်သည်။

"နောက်ဆုံးမှာလား... အင်း... နောက်ဆုံးမှာ မကောင်းမှုကို ခုံမင်နှစ်သက်သွားတဲ့ ကောင်လေးဟာ စာရိတ္တပိုင်း ပျက်စီးပြီး လမ်းပေါ်ကို ရောက်သွားတော့တာပေါ့"
"ကောင်လေး သနားပါတယ်နော်ဦး"
"ဘယ်တတ်နိုင်မလဲကွယ်... သူ့ ကံပေါ့။ ဖြစ်ချိန်တန်လို့ ဖြစ်တယ်လို့ ဘဲ သဘောထားရမှာပေါ့"

ကောင်လေးက နားစိုက်ထောင်နေရင်း မှတ်ချက် စကားကို ဝင်ပြောလိုက်သည်။

"ဒါပေမယ့်နော်ဦး... သူသာ အစလုပ်ပြီး ကျောင်းမပြေးဖြစ်ခဲ့ရင် ခုလို ဖြစ်ချင်မှ ဖြစ်မှာ"

လူကြီး၏ မှုန်မှိုင်းရီဝေနေသည့် မျက်ဝန်းတို့ လင်းပွင့်သွားသည်။ သူသွားလိုသည့် ပန်းတိုင်ကို တွေ့ မြင်လိုက်ရသည့် မျက်ဝန်းမျိုးဖြစ်သည်။ ထိုပန်းတိုင်သို့ ရောက်ရန် သူအမျိုးမျိုးကြိုးစား၍ သွားခဲ့သည်။ စကားကို သွယ်ဝိုက်၍ တစ်မျိုး၊ တည့်တည့်တဖုံ မုန်းလိုက မုန်းစေတော့ဟု တွေးကာ အမျိုးမျိုး လှည့်ပတ်၍ ပြောခဲ့သည်။ ယခု ကောင်လေး၏ မှတ်ချက် စကားက သူစိုက်ပျိုးခဲ့သမျှတို့  ပြန်လည်ဖူးပွင့်ခဲ့ခြင်း ဖြစ်သည်။

"ဒါပေါ့ ခုချိန် အဲဒီကောင်လေးရဲ့ စိတ်ထဲမှာ နောင်တရနေပြီး ဖြစ်နိုင်မယ် ဆိုရင် အတိတ်ကို ပြန်သွားပြီး ဆရာမဆီမှာ သွားပြန်အရိုက်ခံချင်တဲ့ အတွေးမျိုးကို တွေးရင်လဲ တွေးနေနိုင်တာဘဲလေ။ တကယ်တော့ လူလေးရယ် ကျောင်းတက်ရမယ့် အရွယ်မှာ ကျောင်းတက်နေတာ အကောင်းဆုံးပါဘဲကွယ်"

ပတ်ဝန်းကျင် တစ်ခုလုံး ငြိမ်ကျ တိတ်ဆိတ်သွားသည်။ ခဏအကြာတွင် ကောင်လေးထံမှ သက်ပြင်းချသံသဲ့သဲ့ ထွက်ပေါ်လာသည်။

"ကျွန်တော် သွားတော့မယ်ဦး"
"ဘယ်ကို သွားမှာလဲကွဲ့ "
"အိမ်ကိုဘဲ ပြန်တော့မယ်ဦး... ဒီနေ့ ဖြစ်ပျက်ခဲ့သမျှကို အမေ့ကို အမှန်အတိုင်း ဖွင့်ပြောလိုက်မယ်။ အမေ စိတ်ဆိုးလို့  ရိုက်လဲ အရိုက်ဘဲ ခံလိုက်တော့မယ်"
"လူလေးသာ အမှန်အတိုင်း ဖွင့်ပြောလိုက်ပါ... လူလေး အမေက ရိုက်ချင်မှ ရိုက်မှာပါ"

ကောင်လေးက ပုဆိုးကို ပြင်ဝတ်လိုက်ပြီး ကျောပိုးအိတ်ကို လွယ်လိုက်သည်။ ထို့ နောက် တံမြက်စည်းလှည်းသည့် လူကြီးကို နှုတ်ဆက်လိုက်ပြီး အိမ်အပြန် ခြေလှမ်းတို့ ကို စလိုက်သည်။ အိမ်အပြန် ခြေလှမ်းတို့ က အလာကကဲ့သို့ မဟုတ်တော့ သွက်လက်ဖျတ်လတ်နေ၏။ ခြေလှမ်းတို့ က ဦးတည်ရာမဲ့ သွားသည့် ခြေလှမ်းများ မဟုတ်တော့။ ပန်းတိုင်ကို ရှေးရှု၍ သွားနေသည့် ခြေလှမ်းများ ဖြစ်သည်။ ပုံပြင်ထဲမှ ကောင်လေး ဘယ်ရောက် သွားပြီလဲဟု သူမမေးဖြစ်တော့ပါ။ ထိုကောင်လေး ဘယ်ရောက်လို့ ဘာဖြစ်နေပြီလဲ ဆိုသည်ကို သူရိပ်မိခဲ့ပြီဘဲ။ ခဏတာ ပျော်ရွှင်မှုတို့ ကို အားကျခဲ့ရသော်လဲ ထိုကောင်လေးလို အခြေအနေမျိုးဖြင့် ဘဝကို မဖြတ်သန်းလိုပါ။ ထို့ ကြောင့် ကောင်လေးလို မဖြစ်အောင် ကောင်လေး ရှောင်ပုန်းခဲ့သည့် လမ်းကို သူလျှောက်ရမည် ဖြစ်သည်။ အိမ်အပြန်လမ်းတွင် သူ့ အသိဥာဏ်တို့ လင်းပွင့်ခဲ့ပြီ ဖြစ်သည်။

တရွေ့ ရွေ့ ဖြင့် ဝေးကွာသွားသည့် ကောင်လေး၏ ကျောပြင်ကို ကြည့်ပြီး သက်ပြင်းတချက်ကို ဟူးခနဲ မှုတ်ထုတ်လိုက်၏။ ထို့ နောက် ဖင်စီခံနားအထိ ကပ်လာသည့် ဆေးလိပ်ကို ခပ်ပြင်းပြင်း တချက် ဖွာရှိုက်လိုက်ပြီး မီးသတ်ကာ အနားရှိ အမှိုက်တောင်းထဲသို့ ပစ်ထည့်လိုက်သည်။ ဘာဖြစ်ဖြစ် လမ်းပေါ်ရောက်လာနိုင်သည့် အမှိုက်တစကို သူရှင်းထုတ်နိုင်ခဲ့ပြီ။ ကိုယ်တိုင်က လမ်းမှားကို လျှောက်ခဲ့မိပေမယ့် သူတို့ လေးတွေကို လမ်းမလွဲစေလို၊ ကိုယ်တိုင်က ပန်းတိုင် မရှိတော့ပေမယ့် သူတို့ လေးတွေကို ပန်းတိုင် မပျောက်စေလိုတာ သူ့ စေတနာ ဖြစ်သည်။ ထို့ နောက် စောစောက ဘေးနားချထားသည့် တံမြက်စည်းကို ကောက်ယူလိုက်သည်။ ကိုယ့်အတွက် မဟုတ်ပေမယ့် တခြားသူတွေ စိတ်ကြည်လင် လန်းဆန်းစွာ နားနေနိုင်ဖို့ ပန်းခြံအတွင်းမှ အမှိုက်များကို ရှင်းရဦးမည်။ ဒါကဘဲ သူတတ်နိုင်သည့်ဘက်မှ လောကကြီးကို အလှဆင်ခြင်း တစ်မျိုးမဟုတ်ပါလား။ အားလုံးကို သူပျော်စေချင်သည်။ မကောင်းသည့် အရာကို အပျော်ဖြစ်စေ၊ အစမ်းသဘောဖြစ်စေ မစမ်းသပ်စေလို။ အစရှိ အနောင်နောင်မို့ အကျင့်ပါသွားမည်ကို စိုးမိသောကြောင့် ဖြစ်သည်။

Wednesday 21 November 2012

အိမ်ပြန်ချိန်

 (၁)
ဖုန်းမြည်သံကို နားထဲမှာ ကြားနေရ၏။ သို့ သော် ကျိန်းစက်နေသည့် မျက်လုံးတို့ ကြောင့် ဖုန်းကို လက်ဖြင့်သာ လိုက်စမ်းနေမိသည်။

"အင်... အင်း... ဟ... လို..."
"... ဟလို... ညီညီလား... အိပ်နေတာလား"
"အင်း... ပြော... ရတယ်"
"ငါပါ မောင်မောင်းဝင်း"
"အင်း... သိတယ် ပြော... သယ်... ရင်း"
"အေး... ငါ... မနက်ဖြန် မနက် 7:55 နာရီ လေယောဉ်နဲ့  မြန်မာပြည်ကို ပြန်ဖြစ်မယ်"
"အင်... ဘယ်လိုဖြစ်တာလဲ ဗြုန်းစားကြီးပါလား။ ဟိုတလောကဘဲ တစ်ခါပြန်ထားသေးတယ် မဟုတ်လား"
"အေး... ဒီတစ်ခေါက်က အပြီးပြန်ဖြစ်မှာ"
"ဘာ... ဘယ်လို..."

အိပ်ချင်စိတ်တို့ ကြက်ပျောက်၊ ငှက်ပျောက် ပျောက်သွား၏။ အစစ အရာရာ အဆင်ပြေနေတဲ့ဟာကို ဒီိကောင် ဘယ်လို ဖြစ်ရတာလဲဟု တွေးလိုက်မိသည်။ ဟိုတရက်ကဘဲ ရာထူးတိုးလို့ ဆိုသဖြင့် East Code ကမ်းခြေတွင် ပါတီပွဲပေးသဖြင့် သွားစားသောက်ခဲ့ ကြသေးသည်။ ကိုယ်ဘဲ အိပ်ချင်မူးထူး ဖြစ်နေတာကြောင့်လားဟု သေချာအောင် နောက်တစ်ခေါက် ထပ်မေးမိ၏။

"အပြီးပြန်မှာ ဟုတ်လား... ဘာဖြစ်လို့ လဲ"
"အေးကွာ... ညက ဒက်ဒီ ဆုံးပြီလို့ အိမ်က ဖုန်းလှမ်းဆက်တယ်။ ဒါကြောင့် ငါအားချင်း ပြန်ရမှာ"
"ဟာ... ဟုတ်လား... ကျန်းကျန်းမာမာကြီးကနေ ဘယ်လို ဖြစ်ရတာလဲကွာ"
"ဦးနှောက်သွေးကြော ပြတ်တယ် ပြောတာဘဲကွာ။ နံနက်ပိုင်း breakfast စားတဲ့အချိန်ထိ အကောင်းကြီး ရှိနေသေးတယ်တဲ့"
"အေးကွာ... ငါလဲ စိတ်မကောင်းပါဘူး"

ညီညီ တကယ် စိတ်မကောင်း ဖြစ်သွားမိ၏။ မောင်မောင်ဝင်းနှင့် စင်ကာပူ ရောက်မှ ခင်သည် ဆိုသော်လဲ တကယ့် ငယ်ပေါင်းရင်းချာတွေလို ပေါင်းမိကြခြင်း ဖြစ်သည်။ ထို့ ပြင် မြန်မာပြည် ပြန်ရောက်တိုင်း ရန်ကုန်မြို့ ရှိ မောင်မောင်ဝင်းတို့ အိမ်ကို ဝင်ထွက်လေ့ ရှိသဖြင့် သူ့ အိမ်သားများနှင့်လဲ ရင်းနှီးနေ၏။ ပွင့်လင်းဖော်ရွေသည့် မောင်မောင်ဝင်း၏ ဒက်ဒီကို မြင်ယောင်မိလိုက်သည်။ ကျန်းကျန်းမာမာကြီးကနေ ဖြစ်သွားသည် ဆိုသဖြင့် ပို၍ နှမြောမိသည်။ သို့ သော် သေမင်းကို ဘယ်သူက တားနိုင်မှာလဲ။

"အေးကွာ ဗြုန်းစားကြီး ဖြစ်သွားတော့ ငါလဲ ယုံတောင် မယုံနိုင်ဘူး။ ဒါပေမယ့် ဘယ်တတ်နိုင်မလဲကွာ ကံတရားပေါ့။ အဲဒါကြောင့် ငါပြန်မယ့်အကြောင်း မင်းကို လှမ်းအသိပေးတာ"
"အေး... အေးပါ သူငယ်ချင်းရာ... ဒါနဲ့ မင်း တကယ်အပြီး ပြန်ဖို့ ဆုံးဖြတ်လိုက်ပြီလား။ ဆုံးတဲ့လူက ဆုံးသွားပြီးပြီဘဲ အလည်ခဏ ဖြစ်ဖြစ်ဘဲ ပြန်ပြီး နာရေးပြီးတော့ ပြန်လာပေါ့။ မင်းအလုပ်က ဒီအတိုင်းကြီး ပြန်သွားရရင် နှမြောစရာ"

ဘူမိဗေဒ ကျောင်းဆင်း မောင်မောင်ဝင်းက စင်ကာပူနိုင်ငံတွင် လစာတော်တော်လေး ကောင်းသည်။ တစ်လကို စင်ကာပူဒေါ်လာ ၄၀၀၀ ခန့် ရသည်။ ထို့ ကြောင့် ဖြစ်နိုင်လျှင် သူ့ ကို မပြန်စေချင်သေး။ ငယ်တုန်း ရှာလို့ ရနိုင်သလောက် ရှာစေချင်သေးသည်။

"တလောကမှ ပြန်ထားတဲ့အပြင် ရာထူးကလဲ တိုးပေးထားတာ မကြာသေးတော့ အလုပ်က ခွင့်မပေးဘူးကွ။ ငါလဲ သေချာရှင်းပြတာဘဲ မရဘူး။ ဒါကြောင့် မထူးဘူး ဆိုပြီး တခါတည်း အလုပ်ထွက်စာ တင်လိုက်တယ်"
"မင်းတို့ အလုပ်ကလဲကွာ... နာရေးကို"
"ခွင့်မရတာဘဲ ကောင်းပါတယ်ကွာ။ ဆုံးဖြတ်လို့ ပိုကောင်းသွားတာပေါ့။ မင်းလဲ သိတဲ့အတိုင်းလေ ဒက်ဒီမရှိတော့ဘူး ဆိုတော့ ဟိုမှာကလဲ မိန်းမသားတွေချည်း ကျန်ခဲ့တာလေ။ မြန်မာနိုင်ငံ မှာကလဲ ယောက်ကျားသား တစ်ယောက်တော့ ရှိမှဖြစ်မှာပေါ့။ ဒါကြောင့် ငါပြန်ဖြစ်တာလဲ ပါပါတယ်"
"အေးလေ ဒါလဲ ဟုတ်တာဘဲ။ အရေးအကြောင်းဆို ယောက်ကျားသား တစ်ယောက်တော့ ရှိသင့်တာဘဲ"
"ဒါပေါ့ကွာ ဘယ်တတ်နိုင်မလဲ  အိမ်ပြန်ချိန် ရောက်လာပြီလို့ ဘဲ ဆိုရမှာပေါ့။ အေး... ဒါဆိုလဲ ဒါဘဲ သူငယ်ချင်း... မင်းလဲ ဆက်အိပ်လိုက်ဦး... နောက်မှ ထပ်တွေ့ ကြတာပေါ့"

မောင်မောင်ဝင်းကတော့ ဖုန်းချသွားခဲ့ပြီ။ သို့ သော် ညီညီ ဆက်အိပ်မရတော့။ မောင်မောင်ဝင်း နောက်ဆုံး ပြောသွားသည့် အိမ်ပြန်ချိန် ရောက်လာပြီဟူသော စကားသံကို ပြန်ကြားယောင်နေမိ၏။ မောင်မောင်ဝင်းကတော့ အိမ်ပြန်ချိန်ရောက်ပြီ။ ကိုယ်တွေ အိမ်ပြန်ချိန်ကရော ဘယ်တော့လဲ။ မိဝေးဖဝေးဖြင့် ရေခြားမြေခြားမှာ ဘယ်လောက်ထိ နေနေရဦးမည်လဲ။ ထိုသို့  တွေးမိတော့ ရင်မောရသည်။ ထို့ ကြောင့် ဘာကိုမှ မတွေးတော့ဘဲ အိပ်ပျော်ဖို့ ကြိုးစားလိုက်သည်။

(၂)
Tea Break နားချိန်တိုင်း စက်ရုံဘေးဘက်တွင် ကော်ဖီသောက်ရင်း အမြဲထိုင်ဖြစ်လေ့ ရှိသည်။ စက်ရုံက လေယာဉ်ကွင်းဘေးတွင် တည်ရှိခြင်းကြောင့် ဒီနေရာလေးက မြင်ကွင်းကောင်းပြီး လေကောင်းလေသန့် ရ၏။ သို့ သော် အိမ်လွမ်းဝေဒနာကိုတော့ ပို၍ ခံစားရသည်။ တဝေါဝေါ ပျံတက်သွားသည့် လေယာဉ်ပျံကြီးများကို စိတ်က ခိုစီးပြီး အိမ်ကို ပြန်ပြန်ရောက်သွားတတ်၏။ ကိုယ့်အတွေးဖြင့်ကိုယ် ငြိမ့်ငြိမ့်ညောင်းညောင်းလေး စီးမျောနေစဉ် လှဌေးတစ်ယောက် အမောတကော ရောက်လာသည်။

"ညီညီ... ရေ... ညီညီ..."
"အေး... ပြော... ဘာကိစ္စလဲ"
"မင်းဖုန်းက လိုင်းဖုန်းဆိုတော့ Over Sea ခေါ်လို့ ရမှာပေါ့"
"အေး... ရတယ်လေ"
"ဒါဆို ငါ့ကို ကူညီပါဦးကွာ။ အိမ်ကို ဖုန်းဆက်ချင်လို့ ငါ့ဖုန်းထဲမှာကလဲ Over Sea ပိုက်ဆံက ကုန်နေပြီ။ ဖုန်းကဒ်ဝယ်ပြီးသားကလဲ မရှိလို့ ... အဲဒါ..."
"ဘယ်လိုကြောင့် ခုမှ အိမ်ကို အသဲအသန်ကြီး ဖုန်းခေါ်ချင်နေရတာလဲ။ ပြဿနာ ရှိလို့ လား"
"ပြဿနာရယ်တော့ မဟုတ်ပါဘူးကွာ။ ဒါပေမယ့် ငါ့စိတ်တွေ အရမ်းလေးနေလို့ ကွ။ မနေ့ ကတည်းက စိတ်တွေ လေးနေတာ။ ဒီနေ့ လဲ စိတ်တွေက အရမ်းလေးနေပြီး အလုပ်ထဲမှာလဲ ဘာလုပ်လုပ် အဆင်မပြေဘူး။ အလုပ်လုပ်ရင်း ဟိုဟာ လွတ်ကျ ဒီဟာ လွတ်ကျနဲ့ ။ အဲဒီလို ခံစားရတိုင်း အိမ်သားထဲက တစ်ယောက်ယောက် နေထိုင်မကောင်း ဖြစ်တတ်တယ်လေ။ ဒါကြောင့် အိမ်က လူကြီးတွေ နေထိုင်မှ ကောင်းရဲ့ လား စိတ်ပူမိလို့ ကွ။ ခဏပါကွာ ငါမိနစ်နဲ့ တွက်ပြီး ပိုက်ဆံပြန်ပေးပါ့မယ်"
"သတင်းမေးယုံ ခဏကတော့ ပြောလို့ ရပါတယ်ကွာ ပိုက်ဆံပြန်ပေးစရာ မလိုပါဘူး။ ရော့... ဒါပေမယ့် အကြာကြီးတော့ မပြောနဲ့ ပေါ့။ နို့ မို့ ဖုန်းဘေက တအားတက်သွားမှာကွ"
"အေး... ကျေးဇူးပါကွာ... ခဏဘဲ မကြာစေရဘူး သူငယ်ချင်း စိတ်ချ"

လှဌေးကို ဖုန်းပေးလိုက်ပြီး ညီညီလဲ လေယာဉ်ကွင်းဘက်သို့ ပြန်ငေးနေမိ၏။

"ဟင်... ဟုတ်လား... ခုရော ဘယ်လိုနေသေးလဲ"

ဘေးမှ ဖုန်းပြောနေသည့် လှဌေးအသံက ကျယ်လာသဖြင့် လှည့်ကြည့်မိ၏။ လှဌေးတစ်ယောက် ဖုန်းပြောရင်း မျက်စိမျက်နှာ ပျက်နေသည်။ ထို့ နောက် စက်ရုံရှေ့ဘက်သို့ လျှောက်သွားသည်။ အင်း... ပြဿနာ တစ်ခုခုတော့ ရှိနေပြီဟု တွေးလိုက်မိသည်။ ခဏကြာတော့ လှဌေးက ဖုန်းပြန်လာပေးသည်။ မျက်နှာကလဲ သိပ်မကောင်း။ မနေနိုင်လို့ စပ်စုကြည့်လိုက်မိသည်။

"ဘာဖြစ်လို့ လဲ လှဌေး"
"အမေလေဖြတ်လို့ တဲ့။ ထင်တော့ ထင်တယ် ဒီလောက် စိတ်တွေလေးနေတာ အိမ်မှာ တစ်ခုခုတော့ ဖြစ်နေပြီလို့ "
"ဟင်... လေဖြတ်တာ ဟုတ်လား။ ဘယ်အချိန်က ဖြစ်တာလဲ"
"မနေ့ က မနက်ပိုင်း အိပ်ယာထတော့ ကိုယ်တခြမ်းက လှုပ်မရတော့ဘူးတဲ့။ ဒါကြောင့် ပါရဂူနဲ့ ချက်ချင်း သွားပြရတယ်။ အခု နည်းနည်းတော့ သက်သာလာပြီမို့ စိတ်ပူစရာ မလိုတော့ဘူး ပြောတာဘဲ။ ဒါပေမယ့် သူတို့ က စိတ်မပူနဲ့ ဆိုပေမယ့် စိတ်ပူတာပေါ့"
"မနေ့ ကဆိုတော့ မင်းကို ဖုန်းဆက် အကြောင်း မကြဘူးလား"
"ငါ... အရမ်း စိုးရိမ်နေမှာစိုးလို့ အကြောင်းမကြားသေးတာတဲ့။ မြန်မာပြည်က လူတွေကလဲ ဘာကြောင့် ဒီလို ကိစ္စမျိုးတွေကို ဖုံးထားချင်ကြတာလဲ မသိဘူး"
"အစိုးရိမ် လွန်ပြီး ပြန်လာမှာ စိုးလို့ နေမှာပေါ့။ နိုင်ငံခြားက ပြန်ဖို့ က လွယ်ပေမယ့် တစ်ခေါက်ပြန်ထွက်ဖို့ ဆိုတာက လွယ်တာမှမဟုတ်တာ"

လှဌေး ခဏတော့ ငြိမ်ကျသွားသည်။ သူ့ အတွေးနဲ့ သူ နေပါစေ ဆိုပြီး လွှတ်ထားလိုက်သည်။ သူလဲ သူ့ အမေအတွက် စိတ်ပူနေမှာဘဲ။ ခဏနေတော့မှ ဟူးကနဲ သက်ပြင်း တစ်ချက်ကို မှုတ်ထုတ်ပြီး စကားဆိုလာသည်။

"ပြန်ပြီး အမေ့ကို အနီးကပ် ပြုစုချင်လိုက်တာကွာ။ တကယ်လို့ ခုလို လေဖြတ်တာ မဟုတ်ဘဲ မပြောကောင်း မဆိုကောင်း တိမ်းပါးသွားခဲ့ရင် အသက်တောင် မှီလိုက်မှာ မဟုတ်ဘူး"

လှဌေး စကားသံကို ကြားတော့ မောင်မောင်ဝင်း အဖြစ်က ခေါင်းထဲကို ဖြတ်ကနဲ တိုးဝင်လာသည်။ ဒါလဲ ဟုတ်သည် မောင်မောင်ဝင်း ဆိုလျှင် သူ့ ဒယ်ဒီ အသက်ကိုပင် မမှီလိုက်။

"အိမ်ပြန်ချင်ပြီကွာ။ မိဘတွေလဲ အသက်ကြီးပြီ။ သူတို့ ရဲ့ နောက်ဆုံး အချိန်လေး မရောက်မှီမှာ အနီးကပ် ပြုစုချင်သေးတယ်။ နောက်မှ ငါဘာမှတောင် လုပ်မပေး လိုက်ရပါလားလို့ တစ်သက်လုံး နောင်တရ မနေချင်ဘူးကွာ။ ဒီတခါ ပါမစ်သက်တမ်းကုန်ရင် ထပ်မတိုးဘဲ ပြန်နိုင်မလား ကြည့်ရမယ်"

လှဌေး၏ စကားက ကျွန်တော့် ရင်ထဲအထိ တာသွားသည်။ ငါရော ငါ့မိဘတွေအတွက် ဘာလုပ်ပေးပြီးပြီလဲ။ တစ်လတစ်ခါ ပိုက်ဆံပို့ ပေးနေယုံနဲ့ သား၊ သမီး တာဝန်ကျေပြီလားဟု ကိုယ့်ကိုယ်ကို ပြန်မေးကြည့်မိသည်။ အိမ်ပြန်ချင်ပြီ ဆိုသည့် လှဌေးစကားသံက ကျွန်တော့် စိတ်နှလုံးကို ဆွဲလှုပ်နှိုးသွားသည်။

(၃)
စနေနေ့ ပိတ်ရက် တစ်ရက် ငွေလွှဲရန်နှင့် ဝယ်စရာ ရှိတာတချို့ ဝယ်ရန် ပင်နီဆူလာ ပလာဇာသို့ ရောက်ဖြစ်ခဲ့သည်။  မြန်မာပြည်သို့ ပိုက်ဆံလွှဲနေစဉ် သန်းထွေးက သူတို့ 99ဆိုင်တွင် ရှိနေကြောင်း ဖုန်းဆက်လာသည်။ ထို့ ကြောင့် ငွေလွှဲပြီး ဝယ်စရာရှိတာ နဲနဲဝယ်ပြီး သူတို့ ရှိနေသည့် 99ဆိုင်သို့ ထွက်လာခဲ့လိုက်သည်။ 99ဆိုင်ကို ရောက်တော့ သန်းထွေးနှင့် ကိုသန်းအောင်တို့ က အရှိန်ပင် ရစပြုနေကြပြီ။

"ဟေး... ညီညီလာ... ဘာသောက်မလဲ"
"ရပါတယ် အဆင်ပြောတာဘဲ လုပ်လိုက်ပါ"

ညီညီလဲ ခုံတစ်လုံးဆွဲပြီး ဝင်ထိုင်လိုက်သည်။ သန်းထွေးက ညီညီကို စကားလှမ်းတောက်သည်။

"မောင်မောင်ဝင်း သတင်းကို ကြားပြီးပြီလား"
"အင်း... ဟိုနေ့ က ဖုန်းဆက်တယ်"
"အေးကွာ စိတ်တောင် မကောင်းဘူး။ သူ့ ခမျာ မပြန်ချင့် ပြန်ချင်နဲ့ ပြန်သွားရရှာတယ်"
"ဘယ်တတ်နိုင်မလဲ သူလဲ မပြန်မဖြစ် ပြန်ရတာဘဲ"
"ဒါပေါ့ သူကမှ သူ့ ဒယ်ဒီ မြေကျတာကို မှီဦးမယ်။ အောင်ကြီးတုန်းက ဆိုရင် အဖေ သေတာတောင် မသိလိုက်ရရှာဘူး"
"ဟုတ်လား ဘာကြောင့်လဲဗျ"

တချိန်လုံး ငြိမ်နားထောင် နေသည့် ကိုအောင်သန်းက ဝင်မေးလာခြင်း ဖြစ်သည်။ ကိုအောင်သန်းက သန်းထွေးနှင့် အလုပ်တူသည်။ ညီညီနှင့် သန်းထွေးတို့ ကတော့ တစ်ရွာတည်းနေ ငယ်သူငယ်ချင်းများ ဖြစ်ကြသည်။ ညီညီနှင့် ပတ်သက်ပြီး သန်းထွေးနှင့် မောင်မောင်ဝင်းတို့ ရင်နှီးခဲ့ကြသလို သန်းထွေးကြောင့်လဲ ကိုအောင်သန်းနှင့် ညီညီတို့ သိကြရခြင်း ဖြစ်သည်။

"ကျွန်တော်တို့ သူငယ်ချင်း အောင်ကြီး အဖေဆုံးတော့ သူက မလေးရှားနိုင်ငံမှာလေ။ ဖြစ်တာက ဆိုင်ကယ် အက်ဆီးဒင့် ဖြစ်တာ။ ကျွန်တော်တို့ ရွာမှာ မဟုတ်ဘဲ တခြားနေရာမှာ ဖြစ်တာဆိုတော့ အလောင်းသယ်တာတွေ ဘာတွေက ပြဿနာတွေ ရှိလာပြီ နောက်ပြီး အစိမ်းသေဆိုတော့ ကြာကြာထားလို့ ကလဲ မရဘူး။ ဒီတော့ ချက်ချင်းဘဲ သဂြို င်္လ်လိုက်ရတယ်။ အဲဒီအချိန်တုန်းက မလေးရှားနိုင်ငံကို ဆက်သွယ်ရတာကလဲ ခုလို မလွယ်ကူတော့ အောင်ကြီးကို မဆက်သွယ် ဖြစ်ကြဘူး။ သူ့ အဖေဆုံးပြီး တော်တော်ကြာမှ အောင်ကြီးက သိရတာ"
"ဒါဆို အစ်ကို့ အဖြစ်နဲ့ ခပ်ဆင်ဆင် တူတာပေါ့"

ညီညီရော သန်းထွေးရော ပြိုင်တူ ကိုအောင်သန်းကို လှည့်ကြည့်မိကြသည်။

"အစ်ကိုတို့ က ညီအစ်ကို သုံးယောက်ရှိတယ်။ ညီအငယ်ဆုံးက အစ်ကိုနဲ့  ရှစ်နှစ်ကွာတယ်။ အငယ်ကောင်က လိမ္မာတယ် စာလဲတော်တယ်။ ဒီတော့ သူက အိမ်မှာ အားလုံးရဲ့ အသဲကျော်ပေါ့။ သူဆယ်တန်းကို ဂုဏ်ထူးနှစ်ဘာသာနဲ့ အောင်တယ်။ သူဆယ်တန်း ဖြေပြီးကတည်းက ဒီမှာ ကျောင်းဆက်တက်ဖို့ အစ်ကိုက အားလုံးစီစဉ်ပြီးနေပြီ"

ကိုအောင်သန်းက ဘီယာခွက်ကို ဆွဲယူပြီး တစ်ချက်မော့ လိုက်သည်။ ထို့ နောက်မှ စကားကို ဆက်သည်။ ညီညီတို့ က အသာဘဲ နားစွင့်နေလိုက်ကြ၏။

"ဒီမှာ အားလုံး စီစဉ်ပြီးတော့ သူ့ ကို ဒီကို ခေါ်ဖို့ အစ်ကို မြန်မာနိုင်ငံကို ပြန်တယ်။ ပြန်ခါနီး နှစ်လလောက်ကတည်းက အငယ်ကောင်နဲ့ က အဆက်အသွယ် မရဘူး။ အဘိုးအဘွားတွေ ရွာကို အလည်သွားနေတာနဲ့ ဖုန်းဆက်တဲ့အချိန် အိမ်မှာ မရှိတာနဲ့ ဘဲ ကြုံနေတယ်။ ဖုန်းဆက်တိုင်း မတွေ့ တော့ အစ်ကိုလဲ စိတ်ဆိုးတာပေါ့။ ဒါကြောင့် အိမ်ကို ပြန်ရောက်တာနဲ့ အိတ်ကို ပစ်ချပြီးတာနဲ့ အငယ်ကောင် ဘယ်မှာလဲလို့ ချက်ချင်းမေးလိုက်တယ်။ အဲဒီမှာ အမေက ငိုပြီး အိမ်ထဲကို ဝင်သွားတယ်။ မျက်လုံးတွေကလဲ မို့ အစ်နေတာ။ တစ်နေ့ လုံး တစ်ညလုံး ငိုထားတာမှန်း သိတာနေတယ်။ ဘာများ ဖြစ်ပါလိမ့်လို့ အစ်ကို့ စိတ်ထဲ ထင့်သွားမိတယ်။ နောက်မှ သိရတာက လွန်ခဲ့တဲ့ နှစ်လလောက်ကတည်းက အငယ်ကောင်က ရေနစ်ပြီး ဆုံးသွားပြီ။ အစ်ကို အရမ်း စိတ်ထိခိုက်သွားမှာ စိုးလို့ ဖွင့်မပြောကြသေးတာ"

ဝိုင်းကလေးက တိတ်ဆိတ်သွားသဖြင့် ဆိုင်အတွင်းမှ ဇွန်းသံ၊ ခွက်သံ၊ လူသံတို့ က ပိုကျယ်လာသလား ထင်ရ၏။ ဘာဝင်ပြောရမှန်း မသိသဖြင့် ညီညီက ဘီယာခွက်ကို ကောက်ယူ သောက်လိုက်သည်။ ကိုအောင်သန်းက စကားကို ထပ်ဆက်သည်။

"နောက်တစ်နှစ်ခြားပြီး အမေဆုံးတယ်။ အမေဆုံးတော့ ချက်ခြင်းအကြောင်းကြားလို့ အသုဘကိုတော့ မှီလိုက်တယ်။ ဒါပေမယ့် ဘာမှ ပြုစုခွင့် မရလိုက်ဘူး။ ပိုက်ဆံရလို့ သာ တို့ တွေ ဒီမှာ အလုပ်လုပ်နေကြရတာ တကယ်ဆိုရင် ရေခြားမြေခြားမှာ မိသားစုကို ပစ်ပြီး အလုပ်လုပ်ရတာ မလွယ်ဘူး။ အစ်ကိုဆိုရင် ဒီမှာ အလုပ်လုပ်နေစဉ် အတွင်းမှာ မိသားစုဝင် နှစ်ယောက်ကို ဆုံးရှုံးခဲ့ရတယ်။ တကယ်တန်း တွေးကြည့်ရင် မတန်ဘူးကွာ။ သူတို့ ရဲ့ နောက်ဆုံးအချိန်တွေမှာ သူတို့ အနားကနေ ဘာမှ လုပ်မပေးနိုင်ခဲ့ဘူး။ ဒါပေမယ့် အပြီးပြန်ဖို့ ကလဲ မဖြစ်သေးဘူး။ ဒီတော့ အိမ်ပြန်ချိန်က ဝေးနေသေးတာပေါ့ကွာ"

ဝိုင်းကလေးက နောက်တစ်ကြိမ် ပြန်၍ တိတ်ဆိတ်သွားပြန်သည်။ ကိုအောင်သန်းကို ကြည့်ပြီး ညီညီတို့ စိတ်မကောင်း ဖြစ်ကြရ၏။ ပြောနေရင်း ဝေ့သီလာသည့် မျက်ဝန်းတို့ ကြောင့် ထိုစဉ်က ကိုအောင်သန်း တစ်ယောက် ဘယ်လောက် ထိခိုက်နာကျင်ခဲ့ရမလဲဟု ကိုယ်ချင်းစာမိသည်။

(၄)
ဒီဘက်ရက်များမှာ အလုပ်တွေ ရှုပ်နေသည်။ ဘာအလုပ်တွေ ရှုပ်နေလဲ မေးလျှင်လဲ အတိအကျ ပြောဖို့ က ခက်နေမည်။ ဟိုလုပ်ဒီလုပ်ဖြင့် လူက တစ်ချက်မှ မနားရပေမယ့် ဘာအလုပ် လုပ်နေလဲဟု လက်ဆုပ်လက်ကိုင် မယ်မယ်ရရ ပြလို့ မရ ဖြစ်နေ၏။ သို့ သော် အချိန်မရသဖြင့် အိမ်ကိုပင် ဖုန်းမဆက်နိုင်အောင် အလုပ်က ရှုပ်နေသည်။ ထို့ ကြောင့် အလုပ်ပါးချိန် အချိန်လေးရခိုက် ပိုက်ဆံရောက်မရောက် မေးရန် အိမ်ကို ဖုန်းဆက်လိုက်သည်။

"ဟလို..."
"..... ..... ..... "
"ဆေးရုံရောက်နေတာ ဟုတ်လား"
".... .... ...."
"ဘာဖြစ်လို့ လဲ"
".... .... ...."

ဖုန်းပြောပြီးနောက် ညီညီ တစ်ယောက် ငိုင်ပြီး ကျန်ရစ်ခဲ့သည်။ မသေကောင်း မပျောက်ကောင်း ကံကောင်းလို့ ပါလား။ ဖခင်ဖြစ်သူ ဆိုင်ကယ်မောင်းနေစဉ် ဆီးချိုနှင့် သွေးတိုးကြောင့် မူးပြီး ဆိုင်ကယ်ပေါ်မှ ပြုတ်ကျသဖြင့် ဆေးရုံ တင်လိုက်ရသည်။ ကံကောင်းသည်က ဆိုင်ကယ်ကို ဖြေးဖြေးလေး မောင်းလာခြင်းကြောင့် ကြီးကြီးကျယ်ကျယ် မထိခိုက်မိခြင်း ဖြစ်သည်။ အရင်က သွေးတိုးရှိကြောင်းကို သိသော်လဲ ဆီးချိုရှိခြင်းကို ခုမှသိ၏။ မင်းတို့ ညီအစ်ကိုလဲ ငွေရှာတာက ရှာတာပေါ့။ ဒါပေမယ့် မင်းတို့ အဖေနဲ့ အမေက အသက်ကြီးပြီ။ မင်းတို့ ညီအစ်ကို နှစ်ယောက်လုံး မဟုတ်တောင် တစ်ယောက်လောက်တော့ ပြန်လာပြီ အိမ်အလုပ်တွေကို ဦးစီးသင့်နေပြီဆိုသော ဦးလေး ဖြစ်သူ၏ စကားကို ပြန်ကြားယောင်မိလိုက်သည်။ လူကြီးတွေက အသက်ကြီးလာပြီ ဖြစ်သဖြင့် ကျန်းမာရေးက ယိုယွင်းလာကြပြီ။ အနီးကပ် ပြုစု စောင့်ရှောက်ပေးဖို့ လူလိုလာပြီ။ လူကြီးများကို အနားပေးပြီး ဘုရားသွား၊ ကျောင်းတက်ဖြင့် ကုသိုလ်ရေးကိုဘဲ လုပ်စေချင်မိပြီ။ ဒီကိစ္စကို အစ်ကိုနဲ့ တိုင်ပင်ဦးမှဟု တွေးလိုက်မိသည်။ ထိုစဉ် HRက ရုံးပေါ်ကို လာခဲ့ဖို့ ဖုန်းဆက်လာသည်။ HR မန်နေဂျာက ပါမစ်သက်တမ်းတိုးဖို့ အဆင်မပြေသည့် အကြောင်းကို ခေါ်ပြောခြင်း ဖြစ်သည်။ အိမ်ပြန်ချိန်ဆိုသည့် အချက်ပေးသံက မြည်လာခဲ့ပြီ။ ကံဇာတ်ဆရာက ကြိုတင် ဇာတ်တိုက်ထားသည့် အလား တစ်ကွက်ခြင်း၊ တလွှာခြင်းကို ချပြနေသည်လား ထင်ရ၏။ ညီညီရဲ့ အိမ်ပြန်ချိန်က ရောက်လာခဲ့ပြီ။ ညီညီလဲ အိမ်ပြန်ဖို့ ကို ဆုံးဖြတ်လိုက်ပြီ။ ဒီလိုဘဲ အိမ်ပြန်ချိန်တန်သူတွေ၊ အိမ်ပြန်ချင်သူတွေ အိမ်ကို ပြန်နေကြသလို၊ အိမ်ပြန်ချိန် မတန်သေးသူတွေ၊ အိမ်မပြန်ချင်သူတွေလဲ ရှိနေကြဦးမည်။ သို့ သော် အားလုံးဘဲ တစ်နေ့ တော့ အိမ်ကိုပြန်ကြရမည် မဟုတ်ပါလား။

Monday 5 November 2012

မိုးညတစ်ည၏နောက်...

တိမ်မည်းတိမ်ရိပ်တို့ က လကို ထွေးငုံထားသဖြင့် ညရောင်က အနက်ရောင် အတိပြီးနေသည်။ တဝီဝီ အော်မြည် ပြေးလွှားနေသည့် လေတိုးသံကို နားထဲတွင် အတိုင်းသား ကြားနေရ၏။ မိုးရိပ်မိုးငွေ့ တို့ ကလဲ တရိပ်ရိပ် တလိပ်လိပ်ဖြင့် ဟန်ရေးတပြင်ပြင် ဖြစ်နေကြသည်။ ဖြတ်ကနဲ လက်သွားသည့် လျှပ်ရောင်နောက်မှ ကပ်ပါလာသည့် မိုးခြိမ်းသံက လူကို မကြောက်ကြောက်အောင် ခြောက်လှန့် နေသည့်အလား။ ပြောရမည် ဆိုလျှင် ရာသီဥတုက ကိုယ့်ဘက်ကို လုံးဝမပါ။ သူရပ်နေသည့် နေရာမှ အရှေ့ဘက် အမှောင်ထဲသို့  မှန်းမျှော်ကြည့်လိုက်မိသည်။ လမ်းကလေး တစ်လမ်းရဲ့  အလယ်ခေါင် တည့်တည့်ပေါ်မှာ သူရပ်နေတာပါ။ ဒီလမ်းလေးရဲ့ တဘက်အဆုံးမှာတော့ သူ့ အိမ်ရှိနေသည်။ ထိုအိမ်ထဲတွင် သူ့ မိဘနှစ်ပါးနှင့် အစ်ကို တစ်ယောက်တို့ ရှိနေကြသည်။ ယခုချိန်လောက်ဆိုလျှင် သူတို့  စိတ်ပူနေကြတော့မည်။ အိမ်ပြန်ရောက်ချိန် တန်နေပေမယ့် ပြန်ရောက်မလာသေးသည့်  သူ့ အတွက် သူတို့ ဘာလုပ်လို့ ဘာကိုင်ရမှန်းမသိ ဖြစ်နေကြလိမ့်မည်။ ဒီလမ်းလေးကို ဖြတ်ပြီး ဘယ်လို ပြန်မလဲလို့ ဘယ်နှကြိမ်မြောက်မှန်းမသိ ကိုယ့်ကိုယ်ကို ပြန်မေးကြည့်မိပြန်သည်။ ဤဒေသ၏ အလွန်သရဲခြောက်သည်ဟု နာမည်ကြီးနေသည့် ဒီလမ်းကလေးကို ဒီလိုအချိန်၊ ဒီလို အနေအထားမျိုးဖြင့် တစ်ယောက်တည်း ဖြတ်ပြန်ရလိမ့်မည်ဟု တွေးတောင် မတွေးကြည့်ဖူးခဲ့ပေ။ လမ်းလေးက သူ့ လို တက္ကသိုလ်ဝင်တန်း စာမေးပွဲဖြေရန် ဘော်ဒါတက်နေသည့် ၁၅နှစ် မပြည့်တပြည့် လူငယ်တစ်ယောက်ကို မဆိုထားဘိ အရွယ်ရောက်ပြီးသည့် လူကြီးတချို့ ပင် တစ်ယောက်တည်း ဖြတ်မသွားဝံသည့် လမ်းကလေးပေါ့။ သို့ သော် ယခု ဒီလမ်းလေးကို သူတစ်ယောက်တည်း ဖြတ်ပြန်ရဖို့ အကြောင်းက ဖန်လာပြီ။

ဒီအတွက် နဝဒေးတံတား ဒီဘက်ထိပ်ထိ လိုက်လာခဲ့ပြီးမှ ရာသီဥတု အခြေအနေကို အကြောင်းပြပြီး လှည့်ပြန်သွားသည့် သူငယ်ချင်းကိုဘဲ အပြစ်တင်ရမည်လား။ သို့ မဟုတ် မနက်ဖြန်မနက် အိမ်မှာ လုပ်မည့် အလှူကို သူငယ်ချင်းက အလည်လိုက်မည် ဆိုလာသဖြင့် ဘော်ဒါပိတ်ရက်တိုင်း အမြဲလာကြိုလေ့ရှိသည့် ဖခင်ကို ဒီတခေါက် လာမကြိုဖို့ ဖုန်းဆက်ခဲ့မိသည့် ကိုယ့်ကိုယ်ကိုဘဲ အပြစ်တင်ရမည်လား။ ဒီအခြေအနေထိ ရောက်လာပြီးမှတော့ ဘယ်သူ့ ကိုမှလဲ အပြစ်မတင်ချင်တော့ပါဘူး။ တကယ်က သူငယ်ချင်းဖြစ်သူ လမ်းလေးကို ကြည့်ပြီး ဆိုင်ကယ်ကို မမောင်းရဲလို့ လှည့်ပြန်သွားခြင်း ဆိုသည်ကို သူရိပ်မိနေသည်ဘဲ။ သူငယ်ချင်းဖြစ်သူ မမောင်းရဲလို့ ကိုယ်မောင်းမယ် ဆိုပြီး ပြောရအောင်ကလဲ ကိုယ်တိုင်လဲ မောင်းရဲသည့် အခြေအနေတွင် ရှိမနေ။ လမ်းကလေးက ဘယ်ဘက်ကချောက်၊ ညာဘက်က တောင်တန်းများကြားမှ ဖြတ်စီးဆင်းသွားသည့် တောင်ပတ်လမ်း အမျိုးအစားဖြစ်၏။ လမ်းအထာ မသိတဲ့ လူတစ်ယောက် လက်ရှိ အခြေအနေမှာ မောင်းဖို့ တော်တော်ကို မလွယ်သည့် အနေအထားမျိုးပေါ့။ သူနားလည်ပေးနိုင်ပါသည်။ သို့ သော် သူငယ်ချင်းက လှည့်ပြန်သွားလို့ ရပေမယ့် သူကလိုက်ပြန်ဖို့ တော့ မဖြစ်နိုင်ပါ။ မနက်ဖြန်မနက် အိမ်မှာ လုပ်မည့် အလှူတွင် မိသားစု စုံစုံလင်လင် ရှိမနေလျှင် မိခင်ဖြစ်သူက ထိုအကြောင်းကို ပြောလို့ ဆုံးမှာမဟုတ်တော့။ ထို့ ကြောင့် ယနေ့ ည အိမ်ကို မရောက်ရောက်အောင်ကို ပြန်ရမည်။ သို့ သော် ခုချိန်ထိ ခြေတစ်လှမ်းမျှ သူမလှမ်းဖြစ်သေး...။

ကား၊ ဆိုင်ကယ် ကြုံများ တွေ့ ရမလားလို့ ရပ်စောင့်နေတာ တစ်နာရီခန့် ပင် ရှိခဲ့ပြီ။ နဂိုကမှ လူသွားလူလာပြတ်သည့် လမ်းလေးက ရာသီဥတုကြောင့် ထင်သည် ပိုလို့ ပင် ခြောက်ကပ်သွေ့ ခြောက်နေ၏။ တစ်ယောက်တည်း လမ်းလျှောက်ပြန်ဖို့ အတွက်ကလဲ အကြောက်တရားက သူ့ ကို တုံဆွဲထားနေသည်။ လက်က နာရီကို ကြည့်လိုက်တော့ ည 8:00 နာရီကို ထိုးလုပြီ။ ဒီထက်ပိုစောင့်၍ မဖြစ်တော့ မိုးကလဲ ရွာတော့မည်။ မိုးရွာမှ ပြန်မည်ဆိုလျှင် အိမ်အပြန်ပို၍ ခက်ခဲပေတော့မည်။ မိုးရွာလျှင် တဘက်တောင်ပေါ်မှ မိုးရေများက လမ်းကလေးပေါ်သို့ အဆီးအတားမရှိ စီးဆင်းလာတော့မည်။ ထို့ နောက် လမ်းလေးပေါ်မှတဆင့် တဘက်မှ ချောက်ထဲကို ဆက်၍ စီးဆင်းသွားကြမည်။ ထိုအခါ ရွှံစေးဆန်သည့် လမ်းလေးပေါ်တွင် ရေအိုင်၊ ရေဗွက်များကြောင့် လမ်းလျှောက်ရန် ပို၍ ခက်ခဲလာတော့မည်။ ထို့ ကြောင့် ဆက်စောင့်ဖို့ မဖြစ်နိုင်တော့သဖြင့် ကိုယ့်အားကိုယ်ကိုးပြီး ပြန်ဖို့  ဆုံးဖြတ်လိုက်သည်။ အိမ်အပြန် ခြေလှမ်းတို့ ကို စဖို့ အကြောက်တရားကို အရင် ဖျောက်ရမည်။ ထိုသို့ တွေးမိလိုက်တော့ ဖခင် ဆိုဆုံးမခဲ့ဖူးသည့် စကားတို့ က နားအတွင်း စီးဝင်လာသည်။ ညဘက် သန်းခေါင်သန်းလွဲ နောက်ဖေးသွားလျှင် လိုက်ပို့ ရလေ့ရှိသည့် ဖခင်ဖြစ်သူက အိမ်သာအပြင်ဘက်မှ ထိုင်စောင့်ရင်း ဆိုဆုံးမလေ့ရှိသည်။ ထိုစဉ်ကတော့ ပြီးပြီးရော ထိုဆုံးမစကားတို့ က နားထဲမဝင်ခဲ့ချေ။

"ငါ့သား... ဒီလိုသာ ကြောက်တတ်နေရင် မင်းတော့ ကြီးလာရင် ခက်မယ်။ တကယ်တော့ ကြောက်တယ် မကြောက်ဘူး ဆိုတာ စိတ်က အဓိကဘဲ။ မင်းစိတ်ထဲက အကြောက်တရားကို မဖျောက်နိုင်သေးသရွေ့ ကတော့ အရာရာကို တွေးပြီး ကြောက်နေဦးမှာဘဲ။ အဲဒီလို ကြောက်တတ်ပြီး တပါးသူရဲ့ အကူအညီကို ယူနေရသရွေ့ တော့ လောကမှာ လူဖြစ်ရတာလဲ တပန်းရှုံးနေဦးမှာဘဲ။ တကယ်တော့ လောကမှာ ကြောက်စရာကောင်းတယ် ဆိုတဲ့အရာတိုင်းက ကြောက်ဖို့ ကောင်းတာ မဟုတ်ပါဘူး။ စိတ်က ခြောက်လို့ သာ လူက ကြောက်နေတတ်တာ။ တခါမှ သရဲမခြောက်ခံရဘူးဘဲနဲ့ သရဲကြောက်တယ်ဆိုတာက ဖြစ်သင့်ရဲ့ လား။ သရဲခြောက်ခံရတော့ရော ယောက်ကျားဘဲ ဘာကြောက်စရာ ရှိသလဲ။ သရဲခြောက်ခံရလို့ သေတဲ့လူ မရှိပါဘူး။ အကြောက်လွန်လို့ သေတဲ့လူဘဲရှိတယ်။ ဒီတော့ ဘာကို ကြောက်သင့်သလဲ ဆိုတာကို တွေးကြည့်ပေါ့ ငါ့သား"

ထိုစဉ်က ဖခင်၏ ဆုံးမစကားသံတို့ က ယခုမှ အသိဥာဏ်အတွင်းသို့ တစ်လုံးချင်း စီးဝင်လာသည်။ ထိုအခါ ငါဘာကို ကြောက်နေတာလဲဟု ကိုယ့်ကိုယ်ကို ပြန်မေးမိသည်။ သို့ သော် အဖြေကမရှိ။ သူတစ်ခုခုကို တွေးတွေးပြီး ကြောက်နေပေမယ့် ဘာဆိုသည်ကို လက်ဆုပ်လက်ကိုင် မပြနိုင်။ ဟုတ်တယ် ဘာကိုမှ ရင်ဆိုင်မတွေ့ ရသေးဘဲနဲ့ ငါဘာကို ကြောက်နေရမှာလဲ။ ထိုသို့ စဉ်းစားမိလိုက်သည့် ခဏမှာပင် အကြောက်တရားတို့ လွင့်ပြယ်ကာ ခန္ဓာကိုယ်အတွင်းမှ သွေးတို့ နွေးထွေး ဆူဝေလာသည်။ အိမ်အပြန်လမ်းအတွက် ခွန်အားသစ်တစ်ရပ်ကို မွေးဖွားနိုင်ခဲ့သည့်နောက် ခြေလှမ်းတို့ ကို စလိုက်သည်။ ထိုအခိုက်မှာပင် လေပွေတချက်က သစ်ရွက်တစ်အုပ်ကို စုပ်ဆွဲ သူ့ တည့်တည့်ကို ပစ်ပေါက်လာသည်။ သို့ သော် ထိုအရာက သူ၏ အိမ်အပြန် ခြေလှမ်းတို့ ကို ရပ်တန့် မပစ်နိုင်တော့ပေ။

တဟူးဟူးဖြင့် တိုက်ခတ်နေသည့် လေကို ဆန်တက်ပြီး တသွင်သွင် စီးဆင်းနေသည့် တောင်ပတ်လမ်းလေးအတိုင်း သူစီးမျောလာခဲ့လိုက်သည်။ သစ်ဆိမ့်ပင်ရွာလေး ရှေ့မှ ဖြတ်အလျှောက်တွင် ရာသီဥတု အခြေအနေကြောင့်ထင်သည် ရွာလေးက ပုံမှန်ထက် ပို၍ တိတ်ဆိတ်ငြိမ်ကုပ်နေ၏။ သစ်ဆိမ့်ပင် ရွာလေးကို ကျော်လာခဲ့ပြီးနောက် ရွှေဂူ(ငွေဘုံသာဘုရား)ကုန်း အတက်နား အရောက်တွင် ကြိုးစား၍ မေ့ထားသည့် အကြောင်းအရာတချို့ က ရုန်းကြွနိုးထလာခဲ့သည်။ ဒီကုန်းအတက်မှာ သူငယ်ချင်း ဖိုးကျော်၏ အဖေ သရဲအခြောက်ခံရတာပါလား ဆိုသည့် အတွေးက ကိုယ်ခန္ဓာအနှံ ကြက်သီးမွေးညင်းတို့ ကို တဖြန်းဖြန်းဖြင့်  လှိုင်းထသွားစေ၏။ တစ်ချက်ဝေ့တိုက်လာသည့် လေကြောင့် လူလဲ ချမ်းစိမ့်စိမ့် ဖြစ်သွားသည်။ ဘာမှမဟုတ်ပါဘူးဟု ကိုယ့်ကိုယ်ကို အားပေးပြီး ခရီးဆက် လာခဲ့လိုက်၏။ သို့ ဖြင့် ရွှေဂူ(ငွေဘုံသာဘုရား)ကုန်း အလယ်လောက်ကို ရောက်လာခဲ့သည်။ ထိုအခိုက် ဖျက်ကနဲ လက်သွားသည့် လျှပ်ရောင်အောက်တွင် ကုန်းထိပ်မှ မဲမဲရှည်ရှည် အရိပ်ကြီးနှစ်ရိပ်ကို တွေ့ လိုက်ရသည်။ ထိုခဏတွင် အကြောက်တရားက ဒိန်းကနဲ့ နှလုံးအိမ်ကို ထိုးဆောင့်လာသည်။ လူတကိုယ်လုံး ထူပူသွားပြီး ဦးခေါင်းလဲ နှစ်ဆခန့် ကြီးသွား၏။ ထို့ နောက် အကြောက်တရားက သူ့ တကိုယ်လုံးကို ဖုံးလွှမ်းသွားပြီး တဒင်္ဂ ကိုယ်ခန္ဓာအတွင်းမှ သွေးများ အေးခဲသွားသလား ထင်ရအောင် ထိုနေရာတွင် တောင့်တောင့်ကြီး ရပ်နေမိသည်။ ဘယ်လောက် အချိန်ကြာကြာ သူရပ်နေမိလိုက်သည်မသိ...။

"ရှင်မ သွက်သွက်ကလေးလျှောက် မိုးက ရွာတော့မယ်"
"ကျုပ်လဲ ကြိုးစားလျှောက်နေတာဘဲ... ခေါင်းပေါ်က အထုပ်ကြီးက နဲနဲလေးတော့ လျှောက်ရတာ အဆင်မပြေဘူးတော့်"

တောင်ယာတဲတွင် ညစောင့်အိပ်သည့် သစ်ဆိပ့်ပင်ရွာမှ လင်မယားနှစ်ယောက် လေကြီးမိုးကြီး ကျတော့မည်မို့ ရွာထဲသို့ ပြန်အိပ်ကြခြင်း ဖြစ်သည်။ အထုတ်အပိုးများ ထိုးထိုးထောင်ထောင်ကို ထမ်းပိုးလာခြင်းမို့ ရုတ်တရက် သူလန့် သွားမိခြင်းဖြစ်၏။ ထိုလင်မယားကလဲ လမ်းလယ်ခေါင်တွင် ငူငူကြီးရပ်နေသည့် သူ့ ကို စူးစမ်းဟန် တစ်ချက်ကြည့်ပြီး ကွေ့ ပတ်လျှောက်သွားကြ၏။ ထိုစဉ် မိုးစက်မိုးပေါက်များက တဖောက်ဖောက်ဖြင့် ကျလာသည်။ မျက်နှာပေါ်မှ မိုးရေစက်တို့ ကို သပ်ချပြီး သက်ပြင်းမောတစ်ချက်ကို မှုတ်ထုတ်လိုက်မိသည်။ ထို့ နောက် အိမ်အပြန် ခြေလှမ်းတို့ ကို ပြန်စလိုက်၏။

မိုးက စရွာကတည်းက ရေကို သွန်ချလိုက်သကဲ့သို့ တဝုန်းဝုန်း တဒိုင်းဒိုင်းဖြင့် ရွာချသည်။ မိုးစရွာပြီး ခဏမှာပင် လမ်းညာဘက် တောင်ပေါ်မှ ရေများက တဝေါဝေါဖြင့် လမ်းလေးပေါ်သို့ စီးကျလာသည်။ စောစောက သွေ့ ခြောက်နေသည့် လမ်းလေးပေါ်တွင် ရေအိုင်ငယ်များ၊ ရေစီးကြောင်းငယ်များ၊ ဗွက်အိုင်များ ဖြစ်ပေါ်လာသည်။ ထို့ ကြောင့် လမ်းလျှောက်ရတာ သူ့ အတွက် ပို၍ ခက်ခဲလာခဲ့၏။ ထို့ နောက် သရဲအခြောက်ဆုံး နေရာဟု နာမည်ကြီးနေသည့် သရက်ပင်နှင့် ထန်းပင် ရှိသည့် နေရာသို့ ရောက်လာခဲ့သည်။ ကြားရသည့် သတင်းများ အရဆိုလျှင် တခါတခါ သရက်ပင်အောက်မှ ထွက်ထွက်လာလေ့ ရှိသကဲ့သို့ ၊ တခါတခါတွင် ထန်းပင်ပေါ်မှ မဲမဲအကောင်ကြီး ဆင်းလာလေ့ ရှိသည်ဟု ကြားဖူးခဲ့သည်။ သို့ သော် တဆင့်စကား တဆင့်နားဖြင့် ကြားဖူးခဲ့ခြင်းသာ ဖြစ်၏။ တေ့တေ့ဆိုင်ဆိုင် အခြောက်ခံရဖူးသည့် လူကိုယ်တိုင် ပြောသေည့် သတင်းကိုတော့ မကြားဖူးသေး။ မိုးက ဘယ်အငြိုးကြောင့်မသိ ဝုန်းဒိုင်းကြဲနေသည်။ တဖောင်းဖောင်း လာမှန်သည့် မိုးရေစက်တို့ ကြောင့် လူလဲ အေးစက်ကာ ထုံကျင်နေပြီ။ ရွှေဂူကုန်းတက်တုန်းက အတွေ့ အကြုံရှိထားပြီ ဖြစ်သဖြင့် စောစောကလောက် မကြောက်တော့သော်လဲ စိတ်ထဲ စိုးရွံစိတ်ကတော့ ရှိနေဆဲဖြစ်၏။ ဘယ်ကိုမှ မကြည့်ဘဲ မိမိရှေ့မှ မြေကြီးကိုသာ ငုံကြည့်ပြီး ငိုက်စိုက်ငိုက်စိုက်ဖြင့် လျှောက်လာခဲ့ခြင်းဖြစ်သော်လဲ သရက်ပင်နှင့် ထန်းပင်ရှေ့အရောက်တွင် မျက်လုံးတချက်ဝေ့ကာ ကြည့်မိလိုက်သေးသည်။ ဘာမှတော့ ထူးထူးခြားခြား မမြင်ရ။ ထိုစဉ် ညာဘက်တောင် တောင်ကုန်းပေါ်မှ တဝုန်းဝုန်းဖြင့် ပြေးဆင်းလာသံကို ကြားလိုက်ရသည်။ လူတကိုယ်လုံး ထူပူသွားကာ အကြောက်တရားကြောင့် ကြိမ်အတို့ ခံလိုက်ရသည့် နွားကဲ့သို့ ထိုနေရာမှ တဟုန်ထိုး ပြေးထွက်လိုက်သည်။ အသံက ခဏနှင့် တိတ်သွားသည်။ ခပ်လှမ်းလှမ်း ရောက်သည်အထိ ဘာသံမှ ဆက်မကြားရ။ ထိုအခိုက် ဖခင်၏ ဆုံးမစကားတို့ က နားထဲတိုးဝင်လာသည်။ ငါဘာကို ကြောက်တာလဲဟုလဲ ကိုယ့်ဘာသာကိုယ် ပြန်မေးမိပြန်၏။ ထို့ နောက် စောစောက အသံကြားရသည့် နေရာသို့ ပြန်လျှောက်လာခဲ့ပြီး စူးစမ်းကြည့်လိုက်သည်။ မိမိ ဘာကို ကြောက်တာလဲ ဆိုသည့် အဖြေကို ရှာရန်ဖြစ်သည်။ သူထိုရှေ့ကို အရောက်မှာပင် တဝုန်းဝုန်းဖြင့် တောင်ပေါ်မှ မြေများ ထပ်မံ၍ ပြိုကျလာပြန်သည်။ ထိုခဏမှာပင် သူ့ အသိအာရုံအတွင်းတွင် အကြောက်တရားတို့ ကင်းစင်လွင့်ပါးသွားခဲ့သည်။ ထိုနေ့ က အိမ်အပြန်လမ်းတွင် တန့် ကြည့်တောင်ကွေ့ မရောက်မှီ ကုန်းထိပ်တွင် မည်းမည်း လူရိပ်များကို တွေ့ ခဲ့သေးသည်။ သို့ သော် သူမကြောက်တော့။ ယခုလို သရဲခြောက်သည်ဟုလဲ သူမကြားဖူးခဲ့ပါ။ ထို့ ကြောင့် သူအကြောက်အလန့် မရှိ ကိုယ့်လမ်းကိုယ် ဆက်လှမ်း လာခဲ့လိုက်သည်။

"ဟေ့ကောင်လေး... ဘယ်က ပြန်လာတာလဲ"

တန့် ကြည့်တောင်ဘုရားတွင် လုံခြုံရေး တာဝန်ယူထားသည့် ကပစ(၃) စစ်တပ်မှ ရဲဘော်များဖြစ်သည်။ နယ်မြေ အေးချမ်းသာယာရေးအတွက် ကင်းလှည့် လာကြဟန်တူသည်။

"ဘော်ဒါပိတ်ရက် အိမ်ပြန်လာတာပါ"
"တစ်ယောက်တည်းလား"
"ဟုတ်ကဲ့ တစ်ယောက်တည်းပါဘဲ။ သူငယ်ချင်းတစ်ယောက်က နဝဒေးတံတား ဒီဘက်ထိပ်ထိတော့ လိုက်ပို့ ပေးပါတယ်"
"သြော်... ခုရော တစ်ယောက်တည်း ပြန်ရဲရဲ့ လား။ ရွာထဲထိ ရဲဘော် တစ်ယောက်ယောက်ကို လိုက်ပို့ ခိုင်းပေးရမလား"
"နေပါစေတော့ဦး ကျေးဇူးတင်ပါတယ်။ အရှေ့က တန့် ကြည့်တောင်ကွေ့ တစ်ကွေ့ ကျော်ပြီး ကုန်းဆင်းလိုက်ရင် ရွာထဲကို ရောက်ပြီဘဲ။ ကျွန်တော် တစ်ယောက်တည်း ပြန်ရဲပါတယ်"
"အေး... အေး... ဒါဆိုလဲ ဂရုစိုက်သွား လမ်းတွေက ချောနေတော့ ချော်လဲမှာ စိုးရိမ်ရတယ်"
"ဟုတ်ကဲ့ဦး"

တစ်ယောက်တည်း သရဲခြောက်သည်ဟု နာမည်ကြီးသည့် နေရာတွေကို ဖြတ်ခဲ့ပြီး ဒီနေရာထိတောင် ရောက်ခဲ့ပြီဘဲ သူဘာကို ကြောက်နေရဦးမှာလဲ။

"ဒီကောင်လေး မဆိုးဘူးဘဲ။ ဒီအချိန်၊ ဒီလမ်း၊ ဒီခရီးကို ဒီရာသီဥတုနဲ့ တစ်ယောက်တည်း ဖြတ်ပြန်ရဲတာ နဲတဲ့ သတ္တိမဟုတ်ဘူး"

နောက်ကျောဘက်မှ ပျံလွင့်လာသည့် ချီးမွမ်းစကားသံ ဖြစ်၏။ တိတိကျကျ ပြောရလျှင် သူစိုက်ပျိုးခဲ့သည့် အသီးအပွင့်တို့ ၏ ရနံကို ရှူရှိုက်ခွင့် ရခဲ့ခြင်း ဖြစ်သည်။ ထိုနေ့ က အိမ်ကို ပြန်ရောက်တော့ ရွှံတွေ၊ ဗွက်တွေနဲ့ မိုးရေတွေ ရွှဲရွှဲစိုနေသည့်သူ ကြွက်စုတ် တစ်ကောင်လို ဖြစ်နေသည်။ ဖြစ်ပျက်ခဲ့သမျှ အကြောင်းစုံကို ဇာတ်စုံခင်းပြတော့ မိခင်ဖြစ်သူက နားထောင်နေရင်း မျက်ရည်များကြားမှ ကြိုးစားပြုံးကာ ငါ့သားလေးကို သနားလိုက်တာဟု ညည်းသည်။ ဖခင်ကတော့ ဘာမှမပြော။ သို့ သော် သားဖြစ်သူအတွက် ကျေနပ်အားရနေဟန်ကို မျက်ဝန်းများမှ တဆင့် သူမြင်နေရ၏။ အစ်ကိုကတော့ ငါ့ညီလေး တော်လိုက်တာဟု အစချီကာ ချီးမွမ်းစကားတို့ ကို တဖွဖွဆိုသည်။ အကယ်၍ ထိုနေ့ က သူသာ ထိုလမ်းကို တစ်ယောက်တည်း ဖြတ်ပြန်ဖို့ ကို စိုးရွံမိသဖြင့် သူငယ်ချင်းနှင့် ပြန်လိုက်သွားခဲ့လျှင်၊ ရွှေဂူကုန်းတက်တွင် ကြောက်၍ နောက်ပြန်လှည့်ပြေးခဲ့လျှင်၊ မြေပြိုကျသည့် နေရာတွင်မစူးစမ်းမလေ့လာဘဲ ရှေ့သို့ သာ ဂမူးရှူးထိုး ထွက်ပြေးခဲ့မိလျှင် သူသည် ခုချိန်ထိ အရင်အတိုင်း ကြောက်တတ် နေဦးမည်။ ခုချိန်မှာတော့ လောကမှာ ကြောက်စရာကောင်းသည် ဆိုသည့် အဖြစ်အပျက်တိုင်းက ကြောက်စရာကောင်းတာ မဟုတ်ကြောင်းကို သူကောင်းကောင်း နားလည်ခဲ့ပြီ ဖြစ်သည်။ မိုးညတစ်ည၏ နောက်နေ့ မှစ၍ လူငယ်လေး တစ်ယောက်သည် အပြောင်းလဲကြီး ပြောင်းလဲသွားခဲ့ပြီ။ ကိုယ့်ကိုယ်ကို ယုံကြည်စိတ် ပိုလာကာ ကိုယ့်အားကိုယ် ကိုးတတ်လာခဲ့ပြီ။ ကြောက်စရာ ကောင်းသည်ဟု ထင်ရသည့် ပြဿနာတို့ ကို ရင်ဆိုင်ဖြေရှင်းရဲသည့် သတ္တိရှိလာခဲ့ပြီး အရင်ထက် ပို၍ ရင့်ကျက်တည်ငြိမ်လာခဲ့ပါတော့သည်။

Friday 5 October 2012

သမီးလေး၏စေရာ

"တောက်"

ထွန်းကျော် တောက်တစ်ချက်ကို ခပ်ပြင်းပြင်း ခေါက်လိုက်သည်။ ထို့ နောက် အိမ်ထဲမှ လှမ်းထွက်ခဲ့လိုက်၏။ ခြေလှမ်းတို့ ဦးတည်ရာက ကိုဇော်ဝင်း၏ အရက်ဆိုင်သို့ ဖြစ်သည်။ ဒီလောက်တောင် ဖြစ်လှတာ တမင်တကာကို ရွဲ့ ပြီး သောက်ပြလိုိက်ဦးမည်ဟုလဲ တွေးလိုက်၏။ ပါးစပ်က ပွစိပွစိဖြင့် ပူညံပူညံ လုပ်တာလောက် စိတ်ပျက်တာ မရှိတော့။ ဒီမိန်းမ ကိုယ်ဝန်ရှိလာမှ ပိုစကားများလာသည်။ ဟိုဟာ ချုပ်ချယ်၊ ဒီဟာ ချုပ်ချယ်ချင်ဖြင့် သူ့ ကို လွှမ်းမိုးဖို့ ကြိုးစားလာသည်ဟုလဲ ထင်မိသည်။ လွတ်လွတ်လပ်လပ် ပေါ့ပေါ့ပါးပါး နေတတ်သည့် သူကလဲ ကိုယ့်ကို ချုပ်ချယ်လာလျှင် နဲနဲမှ သဘောမတွေ့ ပြန်ကန့် လန့် တိုက်လိုက်ရမှ ကျေနပ်တတ်၏။ ခုလဲ သူတို့ ဘော်လုံးအသင်း နိုင်လာသောကြောင့် ရပ်ကွက်က ကိုဇော်ဝင်းဆိုင်တွင် ဂုဏ်ပြုပွဲလေး လုပ်ပေးသည်။ ပုံမှန်ဆိုလျှင် သူသောက်လေ့ သောက်ထမရှိသော်လဲ ခုလို အထိမ်းအမှတ်ပွဲမျိုးတွင် တစ်ခွက်တလေတော့ သောက်ဖြစ်သည်။ လူမှုရေးက ရှိသေးသည် မဟုတ်လား။ ခုတော့ မကောင်းတတ်လို့ တစ်ခွက်လောက် သောက်ဖြစ်လာခဲ့သည်ကို ဇာချဲ့ ကာ တဗျစ်တောက်တောက် ပြောလာတော့ ကန့် လန့် တိုက်ချင်စိတ်က ခေါင်းထောင်ထလာသည်။ ထို့ ကြောင့် စောစောကမှ ပြန်လာခဲ့သည့် ကိုဇော်ဝင်း အရက်ဆိုင်သို့ နောက်တစ်ခေါက် ပြန်ထွက်လာခဲ့ခြင်း ဖြစ်သည်။ ယောက်ကျားများ ခုလို အရွှဲ့ တိုက်တတ်အောင် မိန်းမများက တဗျစ်တောက်တောက်ဖြင့် တွန်းအားပေးနေခြင်းလားဟုလဲ တွေးလိုက်မိသည်။

ထွန်းကျော်က လွတ်လွတ်လပ်လပ် ပေါ့ပေါ့ပါးပါးနေတတ်သည်။ သူ့ မိဘများက ကျိကျိတက် ချမ်းသာကြသူများ မဟုတ်သော်လဲ သူတို့ ဒေသတွင်တော့ သူဌေးစာရင်းဝင်ပင် ဖြစ်၏။ တစ်ဦးတည်းသောသား ထွန်းကျော်ကိုလဲ အလိုလိုက်ထားကြသည်။ ထွန်းကျော်က လွတ်လွတ်လပ်လပ် ပေါ့ပေါ့ပါးပါးဖြင့် ပျော်ပျော်နေတတ်သော်လဲ ပျက်စီးနေသည့် လူငယ်တစ်ယောက်တော့မဟုတ်။ သူ့ တွင် အသိစိတ်တော့ ရှိသည်။ ယောက်ကျားလေး ဖြစ်သဖြင့် အသောက်အစား အနည်းအကျဉ်း ရှိသော်လဲ အကောင်းအဆိုးကို ခွဲခြားတတ်၏။ ဘယ်အရာကိုမှ အလွန်အကျွံ မလုပ်။ အမြဲ သောက်စားရမ်းကား နေတတ်သည့် ဆိုးသွမ်းလူငယ် တစ်ယောက်မဟုတ်။ သို့ သော် မိဘကို ကူညီရကောင်းမှန်းမသိ မိုးလင်းမိုးချုပ် အိမ်မကပ်ဘဲ လျှောက်လည်နေတတ်သည်။ လက်ဖက်ရည်ဆိုင်၊ ဘိလိယက်ခုံ၊ ဂိမ်းဆိုင်၊ ဘော်လုံးကွင်းနှင့် ပိုက်ကျော်ခြင်းကွင်းများတွင် အချိန်ကုန်နေတတ်သည်။ ညနေဘက် ဘော်လုံးကန် (သို့ မဟုတ်)၊ ခြင်းခတ်ရာမှ ပြန်လာလျှင်လဲ အိမ်သို့ တန်းပြန်လေ့မရှိဘဲ လက်ဖက်ရည်ဆိုင်၊ အကြော်ဆိုင်တို့ တွင် တမေ့တမော ထိုင်ပြီး သူငယ်ချင်းများနှင့် စကားဝိုင်းဖွဲ့ နေတတ်၏။ ထွန်းကျော်က အပေါင်းအသင်းကိုတော့ တော်တော်မင်သည်။ ထို့ ကြောင့် မိဘများက ထွန်းကျော်ကို ခြေငြိမ်အောင်ဟု ဆိုကာ မိန်းမပေးစားလိုက်ကြ၏။ မိန်းမရပြီးနောက် ထွန်းကျော် အနည်းငယ် ပြောင်းလဲသွား၏။ နေ့ လည်ဘက် အလည်အပတ် သွားခြင်းများ လျော့နည်းသွားသည်။ မိဘလုပ်ငန်းများကို ဦးစီးပြီး လုပ်ကိုင်လာသည်။ သို့ သော် ညနေဘက် ဘော်လုံးကန်၊ ခြင်းခတ်ပြီး လက်ဖက်ရည်ဆိုင်မှာ တမေ့တမောဖြင့် စကားဝိုင်းဖွဲ့ ပြီးမှ ပြန်တတ်သည့် အကျင့်ကတော့ ပျောက်မသွားသေးချေ။ တနေကုန် အလုပ်လုပ်ခြင်းက မိသားစုအတွက် အချိန်ပေးခြင်း ဖြစ်ပြီး ညနေဘက်က သူ့ အတွက် ကိုယ်ပိုင်အပန်းဖြေခြင်းဟု သူက တွေးထားသည်။ သို့ သော် မိန်းမနှင့် မိဘများက ညနေဘက် ဘော်လုံးကန်ပြီး အိမ်ကို စောစောပြန်လာပြီး မိသားစု ထမင်းဝိုင်းလေးကို လူစုံစုံညီညီဖြင့် စိုစိုပြေပြေလေး စားချင်ကြသည်။ သို့ သော် ထွန်းကျော်က ဘယ်တော့မှ စောမပြန် အမြဲနောက်ကျ၏။ သူတို့ လင်မယားနှစ်ယောက် ထိုကိစ္စကြောင့် အမြဲ စကားများကြသည်။ ခုလဲ ထုံးစံအတိုင်း မိန်းမက ပွစိပွစိ လုပ်သဖြင့် အရွဲ့ တိုက်ကာ အရက်ဆိုင်သို့ နောက်တစ်ခေါက် ထပ်ထွက်လာခဲ့ခြင်း ဖြစ်သည်။

သို့ ဖြင့် ထွန်းကျော်တွင် သမီးလေး တစ်ယောက် ရလာခဲ့ပြီ။ သို့ သော် သူ့ အကျင့်တို့ က ပြောင်းမသွားသည့်အပြင် ပို၍ပင် ဆိုးလာသေးသည်။ ယခင်က တစ်ခါတစ်ရံသာ သောက်လေ့ရှိသော်လဲ ခုနောက်ပိုင်းတွင် မိန်းမကို အရွဲ့ တိုက်ရင်း အရက်စွဲသလိုပင် ဖြစ်ပြီး ညနေတိုင်းလိုလို သောက်ဖြစ်နေသည်။ မိန်းမကလဲ နောက်ပိုင်း ပြောမနိုင်တော့ သဖြင့် လွှတ်ထားလိုက်သည်။ ညမှောင်မှ ထွန်းကျော်တစ်ယောက် ခပ်ထွေထွေလေးဖြင့် ပြန်လာတတ်စမြဲ ဖြစ်သည်။ ထွန်းကျော် သူ့ သမီးလေးကိုတော့ အလွန်ချစ်သည်။ တနေကုန် သမီးလေး... သမီးလေး... ဖြင့်လက်ကမချ။ သူအိမ်ပြန်ရောက်လာလျှင်လဲ သမီးကို အရင်ဆုံး ရှာသည်။ သို့ သော် ညဘက် သူပြန်လာလျှင် သမီးလေးက အိပ်နေပြီ။ ထိုအခါ အိပ်ပျော်နေသည့် သမီးလေးကို ခပ်ဖွဖွလေးနမ်းပြီး နှုတ်ဆက်လေ့ ရှိသည်။ ဒါကညစဉ် အိမ်ပြန်လာတိုင်း သူပြုလုပ်လေ့ရှိသည့် ကိစ္စတစ်ခု ဖြစ်၏။ ထို့ နောက်တွင်မှ ရေမိုးချိုး၊ စားသောက်ပြီး အိပ်ယာဝင်သည်။ တစ်ရက်တွင် ထွန်းကျော် တစ်ယောက် အ်ိမ်ကို အပြန်စောခဲ့သည်။ ထုံးစံအတိုင်း ခပ်ထွေထွေလေးဖြင့် ပြန်လာခဲ့ခြင်း ဖြစ်သည်။ အိမ်ကို ပြန်ရောက်တော့ စောနေသေးသဖြင့် သမီးလေးက မအိပ်သေး။ ထို့ ကြောင့် သူ့ မိန်းမ လက်ထဲတွင် ချီထားသည့် သမီးလေးကို ဆွဲယူပြီး နမ်းလိုက်သည်။ ထိုအချိန်မှာပင် သူ့ ရင်ဘတ် တစ်ခုလုံး ပေါက်ကွဲထွက်သွားသလို ခံစားလိုက်ရသည်။ ဂမူးရှူးထိုး ပြေးဝင်လာသည့် သူ့ ရင်ဝကို စောင့်အကန် ခံလိုက်ရသလို ခံစားလိုက်ရ၏။ သူ့ အနမ်းက သမီးလေး၏ ပါးမို့ မို့ လေးကို ထိလုထိခင်မှာပင် သမီးလေးက ခေါင်းကို ဆတ်ကနဲ တဘက်သို့ လှည့်သွားပြီး စူးစူးဝါးဝါး အော်ငိုလေ၏။ သူဘယ်လိုမှ မျှော်လင့်မထားသည့် တုံပြန်မှု ဖြစ်သည်။ သူ့ ရင်ထဲ လစ်ဟာဆို့ နင့်သွားသည်။

"ဟဲ့... ထွန်းကျော် နင့်တစ်ကိုယ်လုံး အရက်စော်တွေ ဒီလောက် နံစော်နေတာကို ကလေးက ဘယ်လိုခံနိုင်မှာလဲ... ပေး... ပေး ကလေးကို"

မိခင်ဖြစ်သူ၏ အော်ငေါက်သံနှင်အတူ သူ့ လက်ထဲမှာ သမီးလေးကို ဆတ်ကနဲ ဆွဲယူသွားခြင်း ခံလိုက်ရ၏။ သူ့ ရင်ထဲတွင် ဝမ်းနည်းမှုက လှိုက်ကနဲ တက်လာသည်။ ထို့ နောက် သူအိမ်ထဲမှ ပြေးထွက်ခဲ့သည်။ သူဘာကိုမှ မမြင်မကြားတော့။ သူ့ မျက်လုံးထဲတွင် ခေါင်းကို ဆတ်ကနဲ လှည့်သွားကာ စူးစူးဝါးဝါး အော်ငိုနေသည့် သမီးလေး၏ ပုံရိပ်နှင့် မိခင်၏ စကားသံတို့ ကိုသာ ထပ်ခါထပ်ခါ ပြန်မြင်ယောင် ကြားယောင်နေမိ၏။ ကိုယ့်ကိုယ်ကို ပြန်သတိထားမိချိန်တွင်တော့ သူဧရာဝတီမြစ်ကမ်းဘေးသို့ ရောက်နေပြီ။ မြစ်ကမ်းဘေး သဲသောင်ပြင်ပေါ်တွင် ပလက်လှန်ကာ ဖြစ်ခဲ့သမျှကို နဖူးပေါ် လက်တင် စဉ်းစားကြည့်တော့ ဘယ်သူမပြု မိမိမှု ဆိုသကဲ့သို့ ပင် မိမိ အပြစ်သာ ဖြစ်သည်။ ဒီအရက်ကို သောက်ထားလို့ သမီးလေး၏ ငြင်းပယ်မှုကို ခံခဲ့ရသလို မိမိ၏ သွေးသားရင်သွေးကို တခြားသူ တစ်ဦးက မိမိရင်ခွင်ထဲမှ ဆွဲယူသွားခြင်းကို ခံခဲ့ရခြင်း ဖြစ်သည်။ ထို့ ကြောင့် အရင်းစစ်တော့ အမြစ်မြေက ဆိုသလိုပင် အရက်သောက်ထားသည့် သူ့ အပြစ်သာ ဖြစ်သည်။ ထိုနေ့ က စ၍ ထွန်းကျော် တစ်ယောက် အရက်ပြတ်သွားသည်။ ယခုဆိုလျှင် သူ့ သူငယ်ချင်းများ အိမ်လာလည်လျှင်ပင်-

"ဟေ့ကောင် ပေး... ပေး ငါ့သမီးကို... သမီးက ဆေးလိပ်နံ၊ အရက်နံတို့ ဆိုရင် ခံနိုင်တာ မဟုတ်ဘူး"

ထိုသို့ သော စကားကို ဆိုကာ သမီးလေးကို တခြားလူ လက်ထဲမှ ဆတ်ကနဲ ဆွဲယူနိုင်ခဲ့ပြီ။ ထို့ အတူ သူ့ လက်ထဲမှ သမီးလေးကိုလဲ ဘယ်သူမှ ထိုကဲ့သို့ ဆွဲမယူနိုင်တော့။ သမီးဖြစ်သူကြောင့် ထွန်းကျော် အရက်ပြတ်သွားသည်။ ထို့ ကြောင့် သူ့ မိဘများနှင့် မိန်းမဖြစ်သူပါ စိတ်ချမ်းသာ ကြရသည်။ ဒီလိုဖြင့် သူ့ သမီးလေးလဲ လေးနှစ်ကျော်လို့ ငါးနှစ်ထဲရောက်ကာ ကျောင်းပင်နေတော့မည်။ တီတီတာတာ ချွဲနွဲ့ တတ်သည့် သမီးလေးက ထွန်းကျော်၏ အသဲကျော်လေး ဖြစ်လာသည်။ ထွန်းကျော် အရက်ပြတ်သွားသဖြင့် ညနေဘက် ဘော်လုံးကန်၊ ခြင်းခတ်ရာမှ ပြန်လာလျှင် အရက်ဆိုင်မထိုင်ဖြစ်တော့။ သို့ သော် လက်ဖက်ရည်ဆိုင် (သို့ ) အကြော်ဆိုင် တစ်ဆိုင်ဆိုင်တွင် ထိုင်ကာ လေကန်သည့် အကျင့်က မပျောက်သေး။ ဒီနေ့ လဲ လက်ဖက်ရည်ဆိုင်တွင် ထိုင်ကာ စောစောက ကန်ခဲ့သည့် ဘော်လုံးပွဲအကြောင်းကို သူငယ်ချင်းများနှင့် ပြန်စမြုံပြန်နေကြ၏။ စကားကောင်းနေသဖြင့် ထိုနေ့ က ပုံမှန်ပြန်ချိန်ထက် ပို၍ အိမ်ပြန်နောက်ကျခဲ့သည်။ အိမ်အနီးကို ရောက်တော့ ခြံပေါက်ဝမှ ထွက်ကြိုနေသည့် သမီးလေးကို တွေ့ ရသည်။ သမီးလေးက အလွန်ချစ်ဖို့ ကောင်းသည်။ သူပြန်လာတိုင်း ထိုကဲ့သို့ ခြံပေါက်ဝမှ အမြဲထွက်ကြိုနေတတ်သည်။

"ဖေဖေ ရေမြန်မြန်ချိုး ထမင်းစားရအောင်"
"ဟင်... သမီး ထမင်းမစားရသေးဘူးလား။ စားနှင့်တာ မဟုတ်ဘူး သမီးရယ် ဘယ်အချိန် ရှိနေပြီလဲ"
" ဖေဖေနဲ့ အတူတူ စားချင်လို့ စောင့်နေတာပေါ့"
"သမီးမေမေတို့ နဲ့ ဝင်စားလိုက်တာ မဟုတ်ဘူး။ မင်းကွာ သမီးကိုပါ တခါတည်း ထမင်းစား ခေါ်တာမဟုတ်ဘူး"
"ခေါ်ပါ့တော် ခေါ်တာမှ ဒီနေ့ တစ်ရက်တည်း မဟုတ်ဘူး။ နေ့ တိုင်းကို ခေါ်တာ... ဘယ်အချိန် ပြန်လာမယ်မှန်း မသိတဲ့ နင့်အဖေကို စောင့်မနေနဲ့ တခါတည်း ဝင်စားဆိုတာကို သူ့ ဖေဖေနဲ့ မှ စားမယ်တဲ့လေ... သူမို့ ဗိုက်အဆာခံပြီးစောင့်တယ်"

ရေချိုးပြီး ထမင်းစားပွဲကို ရောက်တော့ ည 9:00 ပင်ကျော်နေပြီ။ ထမင်းစားပွဲတွင် မစားသေးဘဲ ထိုင်စောင့်နေသည့် သမီးလေးကို တွေ့ ရတော့ သူစိတ်မကောင်း ဖြစ်သွား၏။

"စားနှင့်တာ မဟုတ်ဘူး သမီးရယ်"
"ဖေဖေနဲ့ စားချင်လို့ စောင့်နေပါတယ် ဆိုမှ"
"ကဲ... ဒါဆိုလဲ စားကြမယ်"

စားကြမယ်သာ ပြောပြီး သူမစားဖြစ်သေး။ ထမင်းကို အားရပါးရစားနေသည့် သမီးလေးကိုသာ ဂရုဏာသက်စွာဖြင့် ငေးကြည့်နေမိ၏။ သမီးလေး ဟန်မဆောင်နိုင်လောက်အောင်ကို ဆာလောင်နေသည်။ ခေါင်းကို ငုံပြီး တစ်လုတ်ပြီး တစ်လုတ်ကို အားရပါးရ စားနေသည်။ ဟိုးအရင် ရက်တွေကတည်းက သူပြန်အလာကို ခုလို ဗိုက်ဆာခံပြီး စောင့်ခဲ့သည်ကို သတိထားမထားမိတာကိုက သူ့ အမှား ဖြစ်သည်။

"ဖြေးဖြေးစားပါ သမီးရယ်... နင်နေပါဦးမယ်"
"သမီး ဗိုက်အရမ်းဆာနေလို့ ပါ ဖေဖေ"

ငိုမဲ့မဲ့ မျက်နှာလေးဖြင့် ဆိုလာသည့် သမီးလေးကို ကြည့်ပြီး သူ့ ရင်ထဲ ဆို့ နင့်သွားမိ၏။

"အင်းပါ သမီးရယ်... ဖေဖေက မာန်တာမဟုတ်ပါဘူး။ သမီးအတွက် စိုးရိမ်လို့ သတိပေးတာပါ"
"ဟုတ်ကဲ့... ဖေဖေလဲ စားလေ"
"အင်း... အင်း... သမီးလဲစား..."

ထိုနေ့ က ထွန်းကျော် ရင်ထဲ မကောင်းသဖြင့် ထမင်းပင် ကောင်းကောင်း စားလို့ မဝင်။ ဗိုက်ဆာလွန်းသဖြင့် ဟန်မဆောင်နိုင်အောင်  ဖြစ်နေသည့် သမီးလေးပုံကို ပြန်မြင်ယောင်မိတိုင်း သူ့ ရင်ထဲက တစစ်စစ်ဖြင့် နာသည်။ သမီးလေး... ငါ့သမီးလေးဖြင့် ချစ်လိုက်တာ ဘာချစ်တာလဲ။ သမီးလေးက သူ၏ အချစ်ကို သက်သေပြသွားခဲ့ပြီ။ သူကတော့ သမီးလေး၏ အတွင်းစိတ်ကို သိဖို့ ဆိုတာဝေးလို့  အပြင်ဘက် ဟန်အမူအရာကိုပင် သေချာဂရုမပြုမိခဲ့။ ခုဘဲကြည့် ရက်တွေ ဘယ်လောက်တောင် ကြာခဲ့ပြီလဲ ဒီနေ့ မှ သူသတိပြုမိသည်။ သူ့ ရဲ့ ပေါ့ပျက်ပျက်နေမှုတို့ က သမီးလေးကို ထိခိုက်စေခဲ့ပြီ။ မရည်ရွယ်ခဲ့ပေမယ့် သူ့ ကြောင့် သမီးလေးမှာ ထိခိုက်ခဲ့ရပြီ။ သူဟာ အသုံးမကျတဲ့ ဖခင်တစ်ယောက်ဆိုသည်ကို ဒီနေ့  သိလိုက်ရပြီ။ ထို့ ကြောင့် ဒီနေ့ မှ စ၍ သမီးလေးကို မထိခိုက် မနာကျင်ရအောင် ဂရုစိုက်ရမည်။ သမီးလေး အနားတွင် တတ်နိုင်သမျှ အနီးကပ်နေပြီး သမီးလေးကို ဒီထပ်ပို၍ နားလည်နိုင်အောင် ကြိုးစားရမည်။ နောက်နေ့ မှ စ၍ ဘော်လုံးကန်မှ ပြန်လာတိုင်း ဘယ်မှ မဝင်တော့ဘဲ အိမ်ကို စောစောပြန်ကာ မိသားစု ထမင်းဝိုင်းလေးကို ပိုမိုနွေးထွေး စည်ကားစေမည်။ သမီးလေးအတွက် ပို၍ အချိန်ပေးပြီး သမီးလေးစေရာအတိုင်း နေထိုင်တော့မည်။ အဘယ်ကြောင့်ဆိုသော် သမီးလေးကသာ သူ၏အသဲ၊ သူ၏အသက်၊ သူ၏ဘဝ မဟုတ်ပါလား။